കേരളത്തിൽ കാലവർഷത്തിൽ 35 ശതമാനം കുറവ്

 സംസ്ഥാനത്ത് കാലവർഷത്തിൽ ഇത്തവണ 35 ശതമാനം കുറവ് രേഖപ്പെടുത്തിയതായി കണക്കുകൾ വ്യക്തമാക്കുന്നു. ജൂൺ നാലുമുതൽ കഴിഞ്ഞ ദിവസം വരെയുള്ള കണക്കുകൾ പ്രകാരമാണിത്. എൽനിനോ പ്രതിഭാസമാണ് ഈ മഴക്കുറവിന് കാരണമെന്ന് കൊച്ചി ശാസ്ത്ര സാങ്കേതിക സർവകലാശാല (കുസാറ്റ്) റഡാർ ഗവേഷണകേന്ദ്രം ഡയറക്ടർ ഡോ. എസ്. അഭിലാഷ് വ്യക്തമാക്കി. ശാന്തസമുദ്രത്തിലെ ഉപരിതല താപനില അസാധാരണമായി ഉയരുന്ന എൽനിനോ പ്രതിഭാസം ഇന്ത്യയിലെ കാലവർഷക്കാറ്റിന്റെ ശക്തി കുറയ്ക്കുകയാണ്. ഇത് 12 മുതൽ 15 മാസം വരെ നീണ്ടുനിൽക്കാൻ സാധ്യതയുണ്ട്.

കഴിഞ്ഞ 15 വർഷമായി സംസ്ഥാനത്ത് മഴക്കുറവ് വർദ്ധിച്ചുവരുന്ന പ്രവണതയാണുള്ളത്. 2025-ൽ എട്ടു ശതമാനമായിരുന്നു ഇതേ കാലയളവിലെ കുറവെങ്കിൽ, 2024-ൽ അത് 37 ശതമാനവും 2023-ൽ 66 ശതമാനവും 2021-ൽ 54 ശതമാനവും 2020-ൽ 17 ശതമാനവും ആയിരുന്നു. നിലവിൽ രാജ്യത്താകെ 41 ശതമാനം മഴക്കുറവാണ് അനുഭവപ്പെടുന്നത്. സംസ്ഥാനത്തെ 44 നദികളെയും ഈ പ്രതിസന്ധി ബാധിക്കുമെന്ന് വിലയിരുത്തപ്പെടുന്നു. അതേസമയം, ബംഗാൾ ഉൾക്കടലിൽ ന്യൂനമർദം രൂപപ്പെടുകയാണെങ്കിൽ ഈ മാസം അവസാനത്തോടെ മഴ ലഭിക്കാൻ സാധ്യതയുണ്ട്.

ജില്ലാടിസ്ഥാനത്തിൽ വയനാട് (65%), ഇടുക്കി (53%), കാസർകോട് (41%), കണ്ണൂർ (41%), പാലക്കാട് (37%), കൊല്ലം (36%), തൃശ്ശൂർ (33%), ആലപ്പുഴ (33%), എറണാകുളം (29%), കോഴിക്കോട് (25%), മലപ്പുറം (20%), കോട്ടയം (20%), പത്തനംതിട്ട (18%) എന്നിങ്ങനെയാണ് മഴക്കുറവ്. തിരുവനന്തപുരത്ത് നിലവിൽ സാധാരണ തോതിലുള്ള മഴ ലഭിച്ചിട്ടുണ്ട്.

കാലാവസ്ഥാ നിരീക്ഷണത്തിനായി കുസാറ്റിൽ പ്രവർത്തിക്കുന്ന അത്യാധുനിക റഡാർ സംവിധാനം കാലാവസ്ഥാ പഠനത്തിൽ വലിയ പങ്കുവഹിക്കുന്നുണ്ട്. 2016-ൽ കേന്ദ്ര ശാസ്ത്രസാങ്കേതിക മന്ത്രാലയത്തിന്റെ സഹായത്തോടെ തുടങ്ങിയ ഈ കേന്ദ്രത്തിന് 20 കിലോമീറ്റർ ഉയരം വരെയുള്ള വായു പ്രവാഹങ്ങളും മേഘങ്ങളുടെ ഘടനയും നിരീക്ഷിക്കാൻ കഴിവുണ്ട്. ദക്ഷിണേന്ത്യയിൽ ഒരു കാമ്പസിൽ ഇത്തരം റഡാർ ഗവേഷണ കേന്ദ്രം ആരംഭിച്ചത് കുസാറ്റിലാണ്.