.jpg)
64 പേര്ക്ക് സഞ്ചരിക്കാവുന്ന ബസില് കയറുന്നത് 140 പേര്, ജോലിഭാരവും ജോലിസമയവും വര്ധിച്ചതായി KSRTC ജീവനക്കാര്
തിരുവനന്തപുരം : പ്രിയദര്ശിനി സൗജന്യ യാത്രയില് കെഎസ്ആര്ടിസി ജീവനക്കാര്ക്ക് കടുത്ത ആശങ്കയെന്ന് സിഐടിയു. ജോലിഭാരവും ജോലി സമയവും വര്ധിച്ചതാണ് ജീവനക്കാരുടെ ആശങ്കയ്ക്ക് കാരണമെന്ന് കെഎസ്ആര്ടിഇഎ സിഐടിയു സംസ്ഥാന വൈസ് പ്രസിഡന്റ് റഷീദ് പി പറഞ്ഞു.
ഓര്ഡിനറി ബസുകളുടെ റണ്ണിങ് ടൈം 15 മുതല് അരമണിക്കൂര് വരെ വര്ധിച്ചതായി ജീവനക്കാര് പറയുന്നു. ഒരു ദിവസത്തെ ഷെഡ്യൂള് പൂര്ത്തിയാക്കുമ്പോള് തന്നെ ഏതാണ്ട് ഒന്നര ദിവസത്തെ ഡ്യൂട്ടിയാണ് ഇപ്പോള് ഇവര്ക്ക് വരുന്നത്. തിരക്ക് നിയന്ത്രിക്കാന് കൂടുതല് ഓര്ഡിനറി സര്വീസുകള് തുടങ്ങണമെന്നാണ് ജീവനക്കാര് ഉന്നയിക്കുന്ന ആവശ്യം.
പ്രിയദര്ശിനി സൗജന്യ യാത്രാ പദ്ധതി പ്രഖ്യാപിച്ചതോടെ ഓര്ഡിനറി ബസുകളില് സ്ത്രീ യാത്രക്കാരുടെ എണ്ണം ഗണ്യമായി വര്ധിച്ചിരിക്കുകയാണ്. 64 പേര്ക്ക് സഞ്ചരിക്കാന് അനുമതിയുള്ള ബസില് സഞ്ചരിക്കുന്നത് 140ലേറെ യാത്രക്കാരാണെന്നാണ് ഇവര് ചൂണ്ടിക്കാണിക്കുന്നത്. പത്തും പതിനഞ്ചും വര്ഷത്തിലേറെ പഴക്കമുള്ള ബസുകളിലാണ് യാത്രക്കാരെ കുത്തിനിറച്ചു കൊണ്ടുപോകുന്നതെന്ന ആശങ്കയും ഇവര് പങ്കുവെക്കുന്നുണ്ട്.
