.jpg)
ഓണ്‍ലൈനില്‍ 300 രൂപയുടെ ലിപ്സ്റ്റിക് ഓര്‍ഡര്‍ ചെയ്ത വനിതാ ഡോക്ടര്‍ക്ക് സൈബര്‍ തട്ടിപ്പിലൂടെ നഷ്ടമായത് ഒരുലക്ഷം രൂപ !
ഓണ്‍ലൈനില്‍ 300 രൂപയുടെ ലിപ്സ്റ്റിക് ഓര്‍ഡര്‍ ചെയ്ത വനിതാ ഡോക്ടര്‍ക്ക് സൈബര്‍ തട്ടിപ്പിലൂടെ നഷ്ടമായത് ഒരുലക്ഷം രൂപ. നവിമുംബൈ സ്വദേശിയായ വനിതാ ഡോക്ടറെയാണ് ഓണ്‍ലൈന്‍ തട്ടിപ്പ് സംഘം കബളിപ്പിച്ച് പണം തട്ടിയത്. കഴിഞ്ഞ നവംബര്‍ രണ്ടാം തീയതി ഡോക്ടര്‍ ഒരു ഇകൊമേഴ്‌സ് വെബ്‌സൈറ്റില്‍ നിന്നും 300 രൂപവ വിലയുള്ള ഒരു ലിപ്സ്റ്റിക് ഓര്‍ഡര്‍ ചെയ്തതിരുന്നു.
ഡെലിവെറി ഡേറ്റിന് മുന്നേ കൊറിയര്‍ കമ്പനിയുടേതെന്ന പേരില്‍ ഓര്‍ഡ്ര്‍ ചെയ്ത പ്രൊഡക്റ്റ് ഡെലിവറി ചെയ്തതായുള്ള സന്ദേശം ഡോക്ടറുടെ ഫോണില്‍ ലഭിച്ചു. എന്നാല്‍, സാധനം കിട്ടാതെ ഡെലിവറി ചെയ്‌തെന്ന സന്ദേശം ലഭിച്ചതോടെ വനിതാ ഡോക്ടര്‍ സന്ദേശത്തിലുണ്ടായിരുന്ന നമ്പറില്‍ വിളിച്ചു. കമ്പനിയുടെ കസ്റ്റമര്‍കെയര്‍ എക്‌സിക്യൂട്ടിവ് തിരികെ വിളിക്കുമെന്നായിരുന്നു മറുപടി. പിന്നാലെ കസ്റ്റമര്‍കെയര്‍ എക്‌സിക്യൂട്ടിവെന്ന പേരില്‍ ഒരാള്‍ ഡോക്ടറെ വിളിച്ചു.
പിന്നീടാണ് തട്ടിപ്പ് നടന്നത്. താങ്കളുടെ ഓര്‍ഡര്‍ പിടിച്ചുവെച്ചിരിക്കുകയാണെന്നും ലഭിക്കണമെങ്കില്‍ രണ്ടുരൂപ കൂടി അടയ്ക്കണം എന്നുമായിരുന്നു കസ്റ്റമര്‍കെയര്‍ എക്‌സിക്യൂട്ടിവിന്റെ നിര്‍ദേശം. ഇതിനായി ബാങ്ക് വിവരങ്ങള്‍ കൈമാറാനായി ഒരുലിങ്കും അയച്ചുനല്‍കി. ലിങ്കില്‍ ക്ലിക്ക് ചെയ്തതോടെ ഒരു ആപ്പ് മൊബൈലില്‍ ഡൌണ്‍ലോഡ് ആയി. ഇത് വനിതാ ഡോക്ടര്‍ അറിഞ്ഞിരുന്നില്ല. രണ്ട് രൂപ അടച്ചതോടെ പ്രൊഡക്ട് ഉടനെത്തുമെന്ന് പറഞ്ഞ് വിളിച്ചയാള്‍ ഫോണ്‍ വെച്ചു.
നവംബര്‍ 9ന് ബാങ്ക് അക്കൌണ്ടില്‍ നിന്നും ആദ്യം 95,000 രൂപയും പിന്നീട് 5000 രൂപയും നഷ്ടപ്പെട്ടതായി മൊബൈലില്‍ സന്ദേശമെത്തി. അക്കൌണ്ട് പരിശോധിച്ചപ്പോള്‍ താനറിയാതെ ഒരു ലക്ഷം രൂപ നഷ്ടപ്പെട്ടതായി ഡോക്ടര്‍ മനസിലാക്കി. ഇതോടെയാണ് താന്‍ നേരിട്ട വമ്പന്‍ തട്ടിപ്പ് ഡോക്ടര്‍ തിരിച്ചറിയുന്നത്. ഇതോടെ വനിതാ ഡോക്ടര്‍ പൊലീസില്‍ പരാതി നല്‍കി. സംഭവത്തില്‍ കേസെടുത്തിട്ടുണ്ടെന്നും അന്വേഷണം ആരംഭിച്ചിട്ടുണ്ടെന്നും പൊലീസ് വ്യക്തമാക്കി.
