പശ്ചിമേഷ്യൻ സം​ഘർഷം ; ബസുമതി അരി കയറ്റുമതി മേഖലയിൽ പ്രതിസന്ധി

 പശ്ചിമേഷ്യൻ  യുദ്ധം രൂക്ഷമാകുന്ന സാഹചര്യത്തിൽ ആഗോള ലോജിസ്റ്റിക്സ് മേഖലയെ തകിടം മറിച്ചതോടെ ഇന്ത്യയുടെ ബസുമതി അരി കയറ്റുമതി മേഖല കനത്ത പ്രതിസന്ധി നേരിടുന്നു. ചരക്ക് നീക്കത്തിനുള്ള ചെലവ് കുത്തനെ ഉയർന്നതും ഷിപ്പിംഗ് തടസ്സപ്പെട്ടതും കയറ്റുമതിക്കാരുടെ ലാഭവിഹിതത്തെ സാരമായി ബാധിച്ചിരിക്കുകയാണ്. ആഭ്യന്തര വിപണിയിൽ അരിവില 10 ശതമാനത്തോളം കുറഞ്ഞിട്ടും, കടൽമാർഗ്ഗമുള്ള ചരക്ക് കൂലിയിലുണ്ടായ വർദ്ധനവ് കയറ്റുമതിക്കാർക്ക് തിരിച്ചടിയാവുന്നു. ഇന്ത്യയുടെ ആകെ ബസുമതി കയറ്റുമതിയുടെ 70 ശതമാനവും മിഡിൽ ഈസ്റ്റ്, പേർഷ്യൻ ഗൾഫ് മേഖലകളിലേക്കാണ് പോകുന്നത് എന്നതിനാൽ നിലവിലെ സാഹചര്യം ഈ വ്യാപാര ശൃംഖലയെ അടിമുടി പിടിച്ചുലച്ചിരിക്കുകയാണ്.

യുദ്ധസാഹചര്യം നിലനിൽക്കുന്നതിനാൽ ഷിപ്പിംഗ് കമ്പനികൾ ഏർപ്പെടുത്തിയ വാർ പ്രീമിയങ്ങളും കണ്ടെയ്‌നറുകളുടെ ക്ഷാമവുമാണ് ചരക്ക് കൂലി ഇരട്ടിയാകാൻ കാരണമായത്. ഗൾഫ് രാജ്യങ്ങളിലേക്കുള്ള ചരക്ക് നിരക്ക് ഒരു കണ്ടെയ്‌നറിന് 600 ഡോളറിൽ നിന്ന് 1,200 ഡോളറായി ഉയർന്നു. ഷിപ്പിംഗ് ചാർജിലുണ്ടായ ഈ കുതിച്ചുചാട്ടം ഒരു ടൺ അരിക്ക് 50 ഡോളറോളം അധിക ചെലവ് വരുത്തുന്നുണ്ടെന്ന് പ്രമുഖ കയറ്റുമതിക്കാർ ചൂണ്ടിക്കാട്ടുന്നു. അധികമായി വരുന്ന ഈ തുക പൂർണ്ണമായും ഉപഭോക്താക്കളിൽ നിന്ന് ഈടാക്കുകയല്ലാതെ കയറ്റുമതിക്കാർക്ക് മറ്റ് പോംവഴികളില്ലാത്ത അവസ്ഥയാണുള്ളത്.

അന്താരാഷ്ട്ര വിപണിയിലെ ഈ അനിശ്ചിതത്വം ആഭ്യന്തര വിപണിയിലും പ്രതിഫലിച്ചു തുടങ്ങിയിട്ടുണ്ട്. കയറ്റുമതി ഓർഡറുകൾ കുറഞ്ഞതും ലോജിസ്റ്റിക്സ് തടസ്സങ്ങളും കാരണം പ്രാദേശിക വിപണിയിൽ അരിവില കുറയുന്ന പ്രവണതയാണ് കാണുന്നത്. ഭൗമരാഷ്ട്രീയ ആഘാതങ്ങൾ കാരണം ഷിപ്പിംഗ് ചെലവിൽ 15-20 ശതമാനത്തോളം വരെ വർദ്ധനവുണ്ടായതായി ഗ്രാന്റ് തോൺടൺ ഭാരത് റിപ്പോർട്ട് ചെയ്യുന്നു. ഇതിനുപുറമെ, ഹോർമുസ് കടലിടുക്കിന് ചുറ്റുമുള്ള തടസ്സങ്ങൾ ഇന്ത്യയുടെ കാർഷിക വ്യാപാരത്തിന്റെ 20 ശതമാനത്തെ ബാധിച്ചിട്ടുണ്ട്. ഏകദേശം 3,500 കണ്ടെയ്‌നറുകളും നൂറുകണക്കിന് കയറ്റുമതിക്കാരും നിലവിൽ വലിയ വെല്ലുവിളികൾ നേരിടുന്നു.

ചരക്ക് നീക്കം തുറമുഖങ്ങളിൽ കുടുങ്ങിക്കിടക്കുന്നതും യുദ്ധ അപകടസാധ്യതയ്ക്കുള്ള ഇൻഷുറൻസ് പ്രീമിയങ്ങൾ പത്തിരട്ടിയായി വർദ്ധിച്ചതും കയറ്റുമതിക്കാരെ കൂടുതൽ പ്രതിസന്ധിയിലാക്കുന്നു. ഒരു കണ്ടെയ്‌നറിന് ഏകദേശം 1,500 ഡോളർ വരെ അധിക സർചാർജ് നൽകേണ്ടി വരുന്നത് ബിസിനസിന്റെ ലാഭക്ഷമതയെ തകർക്കുന്നുണ്ട്. ഈ അസാധാരണ സാഹചര്യം മറികടക്കാൻ വാണിജ്യ മന്ത്രാലയത്തിന്റെയും അഗ്രികൾച്ചറൽ ആൻഡ് പ്രോസസ്ഡ് ഫുഡ് പ്രൊഡക്ട്സ് എക്‌സ്‌പോർട്ട് ഡെവലപ്‌മെന്റ് അതോറിറ്റിയുടെയും അടിയന്തര ഇടപെടലും പിന്തുണയും അത്യാവശ്യമാണെന്ന് ഈ മേഖലയിലുള്ളവർ ആവശ്യപ്പെടുന്നു.