'വോട്ട് ചെയ്തത് വിസില്‍ ചിഹ്നത്തില്‍'; തന്റെ വീട്ടിലെ ജോലിക്കാരെ വിജയ്ക്ക് പരിചയപ്പെടുത്തി വൈക്കോ

എംഡിഎംകെ അധ്യക്ഷന്‍ വൈക്കോയുടെ വസതിയിലെ മുഖ്യമന്ത്രി വിജയ്യുടെ സന്ദര്‍ശനം വൈറല്‍. വൈക്കോയെ വിജയ് സന്ദര്‍ശിച്ചതല്ല ശ്രദ്ധേയമായത്, മറിച്ച് വിജയ്ക്ക് വൈക്കോയുടെ വീട്ടിലെ ജോലിക്കാരെ പരിചയപ്പെടുത്തുന്ന വീഡിയോയാണ് ഇപ്പോള്‍ വൈറലാകുന്നത്. വൈക്കോയുടെ കുടുംബാംഗങ്ങള്‍ ജോലിക്കാരെ വിജയ്ക്ക് പരിചയപ്പെടുത്തുകയും ഇവര്‍ വിജയ്ക്കാണ് വോട്ട് ചെയ്തതെന്ന് പറയുന്നതുമാണ് ശ്രദ്ധേയമായത്.

'ജോലിക്കാര്‍ വിസില്‍ ചിഹ്നത്തിലാണ് വോട്ട് ചെയ്തത്', എന്ന് വൈക്കോ പറയുന്നത് വീഡിയോയില്‍ കേള്‍ക്കാം. മൂന്ന് ജോലിക്കാരെയാണ് വിജയ്യെ പരിചയപ്പെടുത്തിയത്. ആരാധനയോടെ മൂന്ന് പേരും വിജയ്യെ നോക്കുന്നതും തിരിച്ച് സ്നേഹത്തോടെ വിജയ് ഇടപെടുന്നതും വീഡിയോയില്‍ കാണാം. ഇവര്‍ ഒരുമിച്ച് ഫോട്ടോയും എടുക്കുന്നത് വൈറല്‍ വീഡിയോയില്‍ കാണാവുന്നതാണ്.

വീഡിയോ വൈറലായതിന് പിന്നാലെ പ്രതികരണവുമായി വൈക്കോയുടെ മകന്‍ ദുരൈ വൈക്കോ രംഗത്തെത്തി. വിജയ് വരുമ്പോള്‍ കാണാന്‍ സാധിക്കുമോ എന്ന് ജോലിക്കാര്‍ ചോദിച്ചിരുന്നുവെന്നും അതുകൊണ്ടാണ് അവരെ വിജയ്ക്ക് പരിചയപ്പെടുത്തി കൊടുത്തതെന്നും അദ്ദേഹം പറഞ്ഞു. സന്ദര്‍ശനത്തിന് ശേഷം ജോലിക്കാരോടും യാത്ര പറഞ്ഞാണ് വിജയ് മടങ്ങിയത്.