.jpg)
തെരഞ്ഞെടുപ്പ് ഫലത്തിന് പിന്നാലെ ബംഗാളില് സംഘര്ഷം ; ബുള്ഡോസര് ഉപയോഗിച്ച് തൃണമൂല് ഓഫീസ് തകര്ത്തതായി ആരോപണം
തെരഞ്ഞെടുപ്പില് പരാജയപ്പെട്ട തൃണമൂല് കോണ്ഗ്രസുമായി ബന്ധപ്പെട്ട മാര്ക്കറ്റ് യൂണിയന്റെ ഓഫീസാണ് തകര്ത്തതെന്നാണ് പുറത്തുവരുന്ന ആരോപണങ്ങള്.
പശ്ചിമ ബംഗാള് നിയമസഭാ തെരഞ്ഞെടുപ്പ് ഫലത്തിന് പിന്നാലെ കൊല്ക്കത്തയിലെ ഐതിഹാസികമായ ന്യൂ മാര്ക്കറ്റില് ബുള്ഡോസര് ഉപയോഗിച്ച് കെട്ടിടം തകര്ത്തത് വലിയ സംഘര്ഷത്തിന് കാരണമായി. ചൊവ്വാഴ്ച രാത്രിയാണ് മാര്ക്കറ്റിനുള്ളിലെ ഒരു നിര്മ്മിതി ബുള്ഡോസര് ഉപയോഗിച്ച് നിലംപരിശാക്കിയത്. തെരഞ്ഞെടുപ്പില് പരാജയപ്പെട്ട തൃണമൂല് കോണ്ഗ്രസുമായി ബന്ധപ്പെട്ട മാര്ക്കറ്റ് യൂണിയന്റെ ഓഫീസാണ് തകര്ത്തതെന്നാണ് പുറത്തുവരുന്ന ആരോപണങ്ങള്.
സംഭവത്തിന്റെ വീഡിയോ ദൃശ്യങ്ങള് തൃണമൂല് കോണ്ഗ്രസ് എംപി മഹുവ മൊയ്ത്ര സാമൂഹ്യമാധ്യമങ്ങളിലൂടെ പങ്കുവെച്ചു. ബുള്ഡോസര് കെട്ടിടം തകര്ക്കുമ്പോള് ചുറ്റും കൂടിയ ജനക്കൂട്ടം തെരഞ്ഞെടുപ്പില് വന് വിജയം നേടിയ ബിജെപിയുടെ പതാകകള് വീശുന്നതായും ദൃശ്യങ്ങളില് കാണാം. എന്നാല് തകര്ക്കപ്പെട്ടത് അനധികൃത നിര്മ്മാണമാണോ അതോ രാഷ്ട്രീയ പ്രേരിതമായ നീക്കമാണോ എന്ന കാര്യത്തില് ഔദ്യോഗിക സ്ഥിരീകരണം ഇതുവരെ ലഭ്യമായിട്ടില്ല.
