“നിങ്ങൾ ചരിത്രം കുറിച്ചു” ; വിജയ്‌യെ അഭിനന്ദിച്ച് വിക്രമും വിജയ് ദേവരകൊണ്ടയും

വിജയ്‌യുടെ രാഷ്ട്രീയ മുന്നേറ്റത്തെ ഇന്ത്യൻ സിനിമ ഒന്നടങ്കം ആവേശത്തോടെയാണ് വരവേൽക്കുന്നത്. ചിയാൻ വിക്രം, തെലുങ്ക് സൂപ്പർ താരം വിജയ് ദേവരകൊണ്ട തുടങ്ങിയവർ അദ്ദേഹത്തിന് ആശംസകളുമായി രംഗത്തെത്തി. “നിങ്ങൾ ചരിത്രം കുറിച്ചു” എന്നാണ് താരങ്ങൾ ഒന്നടങ്കം പറയുന്നത്. ആദ്യമായി തിരഞ്ഞെടുപ്പ് നേരിട്ട ഒരു പാർട്ടി തമിഴ്നാട്ടിലെ വൻശക്തികൾക്ക് വെല്ലുവിളിയായി മാറിയത് ഇന്ത്യൻ രാഷ്ട്രീയത്തിലെ തന്നെ അത്ഭുതമായിട്ടാണ് വിലയിരുത്തപ്പെടുന്നത്.

നടൻ നാനിയുടെ കുറിപ്പ് ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. “ആദ്യം സംശയിച്ചു, ഇപ്പോൾ കിരീടം ചൂടുന്നു” എന്നാണ് നാനി കുറിച്ചത്. അയൽസംസ്ഥാനങ്ങളിൽ സംഭവിച്ചത് ഇപ്പോൾ തമിഴ്നാട്ടിലും ആവർത്തിച്ചിരിക്കുന്നുവെന്നും, ജനവിധി വ്യക്തമാണെന്നും അദ്ദേഹം കൂട്ടിച്ചേർത്തു. രവി തേജ, നാനി, കാജൽ അഗർവാൾ തുടങ്ങി നിരവധി താരങ്ങളാണ് വിജയത്തിന് അഭിനന്ദനങ്ങളുമായി എത്തുന്നത്. ഇത് വെറും രാഷ്ട്രീയമല്ല, ഇത് ‘അബ്സല്യൂട്ട് സിനിമ’ ആണെന്നും ആരാധകർ വിശേഷിപ്പിക്കുന്നു.

സിനിമയിൽ നിന്ന് രാഷ്ട്രീയത്തിലെത്തി തമിഴ്നാടിന്റെ ഭരണം പിടിച്ച എം.ജി.ആറിന്റെയും ജയലളിതയുടെയും പിൻഗാമിയായി വിജയ് മാറുമോ എന്നാണ് രാജ്യം ഇപ്പോൾ ഉറ്റുനോക്കുന്നത്. വോട്ടെണ്ണൽ അവസാന ഘട്ടത്തിലേക്ക് കടക്കുമ്പോൾ തമിഴ്നാട്ടിൽ ഒരു ഭരണമാറ്റം ഉണ്ടാകുമോ എന്ന് വരും മണിക്കൂറുകളിൽ വ്യക്തമാകും. എന്തായാലും സിനിമയിൽ മാത്രമല്ല, രാഷ്ട്രീയത്തിലും താൻ തമിഴ്നാടിന്റെ ‘ദളപതി’യാണെന്ന് വിജയ് തെളിയിച്ചു കഴിഞ്ഞു.