യു.എസ് തിരഞ്ഞെടുപ്പ് ഫലം: ട്രംപിനേറ്റ തിരിച്ചടിയിൽ നിന്ന് മോദി പാഠം പഠിക്കണമെന്ന് ജോൺ ബ്രിട്ടാസ് എം.പി

ഡൽഹി: യു.എസ് ഇടക്കാല തിരഞ്ഞെടുപ്പിൽ ട്രംപിനേറ്റ തിരിച്ചടിയിൽ പ്രധാനമന്ത്രി നരേന്ദ്ര മോദിയെ പരിഹസിച്ച് ജോൺ ബ്രിട്ടാസ് എം.പി. ട്രംപിന് നേരിട്ട തോൽവിയിൽ നിന്ന് മോദി പാഠം പഠിക്കണമെന്നും 'മൈ ഫ്രണ്ട് ട്രംപിന്' ഏറ്റ തിരിച്ചടി സ്വന്തം രാഷ്ട്രീയത്തിലും പ്രതിഫലിക്കുമെന്ന് തിരിച്ചറിയണമെന്നും അദ്ദേഹം ഡൽഹിയിൽ പറഞ്ഞു.ശതകോടീശ്വരന്മാരുടെയും വിഭജന രാഷ്ട്രീയത്തിന്റെയും തന്ത്രങ്ങൾ യു.എസിൽ തിരിച്ചടിച്ചുവെന്നും അത് മോദി ഗൗരവമായി കാണണമെന്നും ബ്രിട്ടാസ് ചൂണ്ടിക്കാട്ടി. ഇറാൻ പരമോന്നത നേതാവിനെ വധിച്ചപ്പോഴോ പലസ്തീൻ വിഷയത്തിലോ ഇന്ത്യ വ്യക്തമായി പ്രതികരിച്ചില്ല. ഇന്ത്യയിൽ 20 കോടിയോളം വരുന്ന മുസ്ലിം ജനസംഖ്യയ്ക്കനുസരിച്ച് ഭരണരംഗത്ത് അർഹമായ പ്രാതിനിധ്യമുണ്ടോയെന്ന് പരിശോധിക്കണം. "എവിടെയാണ് ട്രംപിന് തെറ്റിയത്" എന്ന് മോദി സ്വയം ചോദിക്കണമെന്നും ആ തെറ്റ് ഇവിടെ ആവർത്തിക്കാതിരിക്കാൻ ശ്രദ്ധിക്കണമെന്നും അദ്ദേഹം പരിഹസിച്ചു.

കേന്ദ്ര ആഭ്യന്തരമന്ത്രി അമിത് ഷായെയും ബ്രിട്ടാസ് വിമർശിച്ചു. അമിത് ഷാ കുറേ നാളായി ശരീരം അനക്കിയിട്ടില്ലെന്നും അതുകൊണ്ട് രാജ്യത്ത് ഒരു പദയാത്ര നടത്തണമെന്നും മോദി റോഡ് ഷോ നടത്തട്ടെയെന്നും അദ്ദേഹം പറഞ്ഞു. കോൺഗ്രസും സിപിഎമ്മും തമ്മിലുള്ള അഭിപ്രായവ്യത്യാസങ്ങൾ മാറി ഇരുകക്ഷികളും കൂടുതൽ അടുക്കും. എം.എ. ബേബിയും രാഹുൽ ഗാന്ധിയും ഒരു വാഹനത്തിൽ സഞ്ചരിക്കുന്നതും എം.എ. ബേബിയും മമതാ ബാനർജിയും കുശലം പറയുന്നതും രാഷ്ട്രീയത്തിൽ സാധ്യമാണെങ്കിൽ ഇനിയും എന്തും സംഭവിക്കാമെന്നും അദ്ദേഹം കൂട്ടിച്ചേർത്തു.