കഷ്ടമായിരിക്ക്, ഒന്നുമേ ഇങ്ക ഇല്ലിയേ..; വിജയ് സത്യപ്രതിജ്ഞ ചെയ്യുന്നത് കാണാനായി എത്തിയ ആയിരക്കണക്കിന് ആരാധകർ നിരാശരായി മടങ്ങി

ചെന്നൈ: നടനും ടിവികെ നേതാവുമായ വിജയ് സത്യപ്രതിജ്ഞ ചെയ്യുന്നത് കാണാനായി എത്തിയ ആയിരക്കണക്കിന് ആരാധകർ  നിരാശരായി മടങ്ങി. ചെന്നൈ നെഹ്റു ഇന്‍ഡോര്‍ സ്റ്റേഡിയത്തില്‍ എത്തിയ ടിവികെ അനുയായികളും ആരാധകരും സ്റ്റേഡിയത്തിന്റെ ഗേറ്റ് പൂട്ടിയിട്ടതു കണ്ട് അമ്പരന്നു. പരിപാടി മാറ്റിയ വിവരമൊന്നും അറിയാതെയാണ് ഇവര്‍ ഒത്തുകൂടിയത്. സത്യപ്രതിജ്ഞാ പരിപാടി മാറ്റിയതില്‍ നിരാശരായി പ്രവര്‍ത്തകര്‍ മടങ്ങുകയായിരുന്നു.

വിജയ് മുഖ്യമന്ത്രിയാകുന്നതു കാണാന്‍ അരുമ്പാക്കം, കോയമ്പത്തൂര്‍ തുടങ്ങി ദൂര ദേശങ്ങളില്‍ നിന്നു വരെ പാര്‍ട്ടി പ്രവര്‍ത്തകരും അനുയായികളും ചെന്നൈ നഗരത്തിലെത്തിയിരുന്നു. സത്യപ്രതിജ്ഞ സംബന്ധിച്ച കൃത്യമായ അറിയിപ്പുകളൊന്നും ഇല്ലാത്തതിനാല്‍ നിരാശയോടെ, ഹൃദയവേദനയോടെയാണ് മിക്കവരും തിരികെപ്പോയത്. 'വിജയ് മുഖ്യമന്ത്രിയാകുമെന്ന് കരുതി ഞങ്ങള്‍ വളരെയധികം സന്തോഷത്തോടെയാണ് വന്നത്, പക്ഷേ ഇവിടെ ഒന്നുമില്ല. ഗേറ്റുകള്‍ അടച്ചിരിക്കുന്നു. ഇത് വളരെ വേദനാജനകമാണ്.' ടിവികെ അനുയായി ചാരുലത പറഞ്ഞു.