ജയിലിനുള്ളിലും പഠനത്തിന് അവസരം; തടവുകാർക്കായി പുതിയ വിദ്യാഭ്യാസ പദ്ധതിയുമായി തെലങ്കാന

ഹൈദരാബാദ് :ജയിൽവാസത്തിനിടയിലും വിദ്യാഭ്യാസം തുടരാൻ തടവുകാർക്ക് അവസരമൊരുക്കി തെലങ്കാന സർക്കാർ. പത്താം ക്ലാസും ഇന്റർമീഡിയറ്റും പഠിക്കാൻ ആഗ്രഹിക്കുന്ന തടവുകാർക്കായി ഓപ്പൺ സ്കൂളിങ് പദ്ധതി ആരംഭിച്ചു. തെലങ്കാന ജയിൽവകുപ്പും തെലങ്കാന ഓപ്പൺ സ്കൂൾ സൊസൈറ്റിയും സംയുക്തമായാണ് പദ്ധതി നടപ്പാക്കുന്നത്.

പദ്ധതിയുടെ ഭാഗമായി ആദ്യഘട്ടത്തിൽ 85 പേർ പഠനത്തിനായി താൽപര്യം അറിയിച്ചിട്ടുണ്ട്. സാധാരണ വിദ്യാഭ്യാസം പൂർത്തിയാക്കാൻ കഴിയാതെ ജയിലിലെത്തിയവർക്കും പഠനം ഇടയ്ക്കുവെച്ച് നിർത്തേണ്ടിവന്നവർക്കും വീണ്ടും വിദ്യാഭ്യാസം നേടാനുള്ള അവസരമാണ് ഇതിലൂടെ ലഭിക്കുന്നത്. ജയിലിനുള്ളിൽനിന്നുതന്നെ പത്താം ക്ലാസ്, ഇന്റർമീഡിയറ്റ് പരീക്ഷകൾക്കായി തയ്യാറെടുക്കാൻ ഇതിലൂടെ സാധിക്കും.

തടവുകാർക്ക് ശിക്ഷാകാലാവധി പൂർത്തിയാക്കിയശേഷം സമൂഹത്തിലേക്ക് തിരിച്ചെത്തുമ്പോൾ മെച്ചപ്പെട്ട ജീവിതം കെട്ടിപ്പടുക്കാൻ വിദ്യാഭ്യാസം സഹായിക്കുമെന്നാണ് പദ്ധതിയുടെ ലക്ഷ്യം. തൊഴിൽ കണ്ടെത്തുന്നതിനും സാമൂഹികമായ പുനരധിവാസത്തിനും വിദ്യാഭ്യാസം പ്രധാന പങ്കുവഹിക്കുമെന്നാണ് അധികൃതരുടെ വിലയിരുത്തൽ. തടവുകാരുടെ ജീവിതത്തിൽ നല്ല മാറ്റങ്ങൾ സൃഷ്ടിക്കുന്നതിനുള്ള പുനരധിവാസ പ്രവർത്തനങ്ങളുടെ ഭാഗമായാണ് ഈ സംരംഭം അവതരിപ്പിച്ചിരിക്കുന്നത്.