സംസ്ഥാനത്തെ ക്രമസമാധാന നില പൂർണ്ണമായി തകർന്നു ; തമിഴ്‌നാട് സർക്കാരിനെതിരെ രൂക്ഷ വിമർശനവുമായി ഉദയനിധി സ്റ്റാലിൻ

 ചെന്നൈ: മുഖ്യമന്ത്രി സി. ജോസഫ് വിജയ് സർക്കാർ 100 ദിവസം പൂർത്തിയാക്കിയ വേളയിൽ തമിഴ്‌നാട് നിയമസഭയിൽ സർക്കാരിനെതിരെ രൂക്ഷ വിമർശനവുമായി പ്രതിപക്ഷ നേതാവ് ഉദയനിധി സ്റ്റാലിൻ. സംസ്ഥാനത്തെ ക്രമസമാധാന നില പൂർണ്ണമായി തകർന്നെന്നും, സമീപകാലത്തുണ്ടായ പല അക്രമസംഭവങ്ങൾക്കും പിന്നിൽ ലഹരിമാഫിയയാണെന്നും അദ്ദേഹം ആരോപിച്ചു. കോയമ്പത്തൂരിൽ 19 വയസ്സുകാരനായ അമുദൻ കൊല്ലപ്പെട്ട സംഭവം സഭയിൽ ഉന്നയിച്ച സ്റ്റാലിൻ, ഇതൊരു ഗുണ്ടാസംഘങ്ങൾ തമ്മിലുള്ള ഏറ്റുമുട്ടലായി ലഘൂകരിച്ചു കാണരുതെന്നും അതൊരു കൊലപാതകമാണെന്നും വ്യക്തമാക്കി. ‘അമുദൻ ഒരു പട്ടികജാതി വിഭാഗത്തിൽപ്പെട്ടയാളാണ്,’ എന്നും അദ്ദേഹം കൂട്ടിച്ചേർത്തു.

ലഹരി ഇടപാടുകളെക്കുറിച്ചുള്ള വിവരങ്ങൾ പുറത്തുവിട്ടതിനാണ് അമുദനെ കൊലപ്പെടുത്തിയതെന്ന് സ്റ്റാലിൻ ആരോപിച്ചു. അമുദന്റെ മാതാപിതാക്കളും തന്നോട് ഇതേ ആശങ്ക പങ്കുവെച്ചിട്ടുണ്ടെന്ന് അദ്ദേഹം പറഞ്ഞു. ‘ലഹരിമരുന്ന് സംഘങ്ങൾക്കെതിരെ ശക്തമായ നടപടി സ്വീകരിക്കേണ്ടതായിരുന്നു. അമുദന്റെ മരണത്തിന് പ്രധാന കാരണം ലഹരിയാണ്. ലഹരിമാഫിയയെക്കുറിച്ച് വിവരം നൽകിയതിനാണ് മകനെ കൊലപ്പെടുത്തിയതെന്നാണ് മാതാപിതാക്കൾ എന്നോട് പറഞ്ഞത്,’ സ്റ്റാലിൻ വ്യക്തമാക്കി. പാർട്ടി നേതാവിന്റെ നിർദേശപ്രകാരം കള്ളക്കുറിച്ചി ജില്ലാ യൂണിറ്റ് ഈ കേസിൽ നീതി ആവശ്യപ്പെട്ട് വലിയ പ്രതിഷേധം സംഘടിപ്പിച്ചിരുന്നുവെന്നും, ഇതൊരു സാധാരണ കൊലപാതകമായി തള്ളിക്കളയാനാവില്ലെന്നും കുറ്റക്കാരെ എത്രയും പെട്ടെന്ന് നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു.

ഇതിന് പുറമെ ചെന്നൈയിലെ തിരുവൊട്ടിയൂരിൽ പന്ത്രണ്ടാം ക്ലാസ് വിദ്യാർത്ഥിയായ ധനുഷിനെ കൊലപ്പെടുത്തിയ സംഭവവും അദ്ദേഹം ചൂണ്ടിക്കാണിച്ചു. ലഹരി വിൽക്കുന്ന സംഘത്തെ ചോദ്യം ചെയ്തതിനാണ് ധനുഷിനെ വെട്ടിക്കൊന്നതെന്ന് സ്റ്റാലിൻ ആരോപിച്ചു. ‘കോയമ്പത്തൂരിലേതിന് സമാനമായ സംഭവമാണ് ചെന്നൈയിലും ആവർത്തിച്ചത്. ലഹരിവിരുദ്ധ പ്രവർത്തനങ്ങൾ നടക്കുന്നുവെന്ന് സർക്കാർ അവകാശപ്പെടുമ്പോഴും ഇത്തരം ക്രൂരമായ കൊലപാതകങ്ങൾ ആവർത്തിക്കപ്പെടുകയാണ്,’ ഉദയനിധി സ്റ്റാലിൻ കുറ്റപ്പെടുത്തി.