വിജയ് സർക്കാരിനെ താഴെയിറക്കാൻ ഡിഎംകെ കുതിരക്കച്ചവടത്തിന് ശ്രമിക്കുന്നതായി തമിഴ്‌നാട് വൈദ്യുതി മന്ത്രി

ചെന്നൈ: വിജയ് സർക്കാരിനെ താഴെയിറക്കാനായി ടിവികെ (തമിഴക വെട്രി കഴകം) എംഎൽഎമാരെ ഡിഎംകെ വൻ തുക വാഗ്ദാനം ചെയ്ത് സ്വാധീനിക്കാൻ ശ്രമിക്കുന്നതായി തമിഴ്‌നാട് ഇൻഫർമേഷൻ ടെക്നോളജി മന്ത്രി ആർ. നിർമൽ കുമാർ. ഡിഎംകെ അധ്യക്ഷൻ എം.കെ. സ്റ്റാലിനും ഉദയനിധി സ്റ്റാലിനും ചേർന്ന് 60 മുതൽ 70 കോടി രൂപ വരെ ഓഫർ ചെയ്തെങ്കിലും, ഒരു ടിവികെ എംഎൽഎപോലും ഈ പണം സ്വീകരിക്കുകയോ പാർട്ടി മാറുകയോ ചെയ്യില്ലെന്ന് മന്ത്രി വ്യക്തമാക്കി.

തെരഞ്ഞെടുപ്പിന് പിന്നാലെ ടിവികെ എംഎൽഎമാരെ ബന്ധപ്പെടാനും പണം കൊടുത്തു വാങ്ങാനും ശ്രമങ്ങൾ നടക്കുന്നുണ്ടെന്ന് മന്ത്രി ആരോപിച്ചു. ഉപതെരഞ്ഞെടുപ്പിൽ ബിജെപിയുടെ പിന്തുണയോടെ ഡിഎംകെയും എഐഎഡിഎംകെയും ചേർന്ന് പൊതുസ്ഥാനാർത്ഥിയെ നിർത്തി വിജയിപ്പിക്കാൻ നീക്കം നടത്തിയെന്നും, അന്തിമമായി എടപ്പാടി കെ. പളനിസാമിയെ മുഖ്യമന്ത്രിയാക്കി പുതിയ സർക്കാർ രൂപീകരിക്കാനാണ് അവരുടെ പദ്ധതി എന്നും അദ്ദേഹം കുറ്റപ്പെടുത്തി.

എന്നാൽ ആരോപണങ്ങൾ ഡിഎംകെ, എഐഎഡിഎംകെ, ബിജെപി കക്ഷികൾ ശക്തമായി നിഷേധിച്ചു. എഐഎഡിഎംകെയുടെ ആറ് എംഎൽഎമാർ രാജി വെച്ച് ടിവികെയിൽ ചേർന്നത് ചൂണ്ടിക്കാട്ടി, ഭരണകക്ഷി കുതിരക്കച്ചവടത്തിലൂടെയാണ് നിലനിൽക്കുന്നതെന്ന് ഡിഎംകെ തിരിച്ചടിച്ചു. അതിനിടെ, സർക്കാരിനെ താഴെയിറക്കാൻ എംഎൽഎമാർക്ക് പണം വാഗ്ദാനം ചെയ്ത കേസുമായി ബന്ധപ്പെട്ട് ഇതുവരെ എട്ട് പേരെ തമിഴ്‌നാട് പോലീസ് അറസ്റ്റ് ചെയ്തിട്ടുണ്ട്. സ്പീക്കർക്കെതിരായ പ്രമേയത്തിന് അനുകൂലമായി വോട്ട് ചെയ്യാൻ 35 കോടി രൂപ വാഗ്ദാനം ചെയ്തെന്ന ടിവികെ എംഎൽഎ എൻ. ഇളയരാജയുടെ പരാതിയിലാണ് പോലീസ് നടപടി. സംഭവത്തിൽ മുൻ ഡിഎംകെ മന്ത്രി വി. സെന്തിൽ ബാലാജിയുടെ സഹോദരനെതിരെയും പോലീസ് കേസ് എടുത്തിട്ടുണ്ട്.