.jpg)
ഗണേശവിഗ്രഹ നിമഞ്ജനത്തിനിടെ ആറ് വിദ്യാര്ഥികള് മുങ്ങി മരിച്ചു
അനാഥാലയത്തില് നിന്ന് മൂന്ന് കിലോമീറ്റര് അകലെയുള്ള കുളത്തിലേക്ക് എട്ട് പേര് അടങ്ങുന്ന സംഘം വിഗ്രഹ നിമജ്ജനത്തിനായി പോയപ്പോഴായിരുന്നു അപകടം
ഹൈദരബാദ്:ഗണേശ വിഗ്രഹ നിമഞ്ജനത്തിനിടെ ആറ് കുട്ടികള് മുങ്ങി മരിച്ചു. ശിരീഷ അനാഥാലയത്തിലെ അന്തേവാസികളായ കുട്ടികളാണ് മുങ്ങി മരിച്ചത്. തെലങ്കാനയിലെ സംഘറെഡ്ഡി ജില്ലയിലെ ഗ്രാമത്തില് ഇന്നലെ രാത്രിയിലാണ് അപകടം.
അനാഥാലയത്തില് നിന്ന് മൂന്ന് കിലോമീറ്റര് അകലെയുള്ള കുളത്തിലേക്ക് എട്ട് പേര് അടങ്ങുന്ന സംഘം വിഗ്രഹ നിമജ്ജനത്തിനായി പോയപ്പോഴായിരുന്നു അപകടം ഉണ്ടായതെന്ന് പൊലീസ് പറഞ്ഞു.
ഗണേശ വിഗ്രഹം നിമജ്ജനം ചെയ്യാനായി എട്ട് വിദ്യാര്ഥികളാണ് കുളത്തില് ഇറങ്ങിയത്. വിഗ്രഹവുമായി കുളത്തിലിറങ്ങിയ വിദ്യാര്ഥികള് ആഴത്തില്പ്പെടുകയായിരുന്നു. ഉടന് തന്നെ നാട്ടുകാരും സമീപത്തുണ്ടായിരുന്ന തൊഴിലാളികളും എത്തിയാണ് രണ്ടുപേരെ രക്ഷപ്പെടുത്തിയത്.മൂന്ന് അടിയിലധികം ഉയരമുള്ള ഏതൊരു വിഗ്രഹം നിമജ്ജനം ചെയ്യുമ്പോഴും പൊലീസില് വിവരം അറിയിക്കണം. ക്രമീകരണങ്ങളും സഹായങ്ങളും നല്കുന്നതിനായി ഒരു വെബ്സൈറ്റ് തന്നെ സജ്ജീകരിച്ചതായും പൊലീസ് പറഞ്ഞു.
