സർക്കാർ ജോലി ഉദ്യോഗാർത്ഥികൾക്ക് ആശ്വാസം: തമിഴ്‌നാട്ടിൽ ഉയർന്ന പ്രായപരിധിയിൽ അഞ്ച് വർഷത്തെ ഇളവ് പ്രഖ്യാപിച്ച് മുഖ്യമന്ത്രി വിജയ്

ചെന്നൈ: തമിഴ്‌നാട്ടിൽ വിവിധ സർക്കാർ തസ്തികകളിലേക്കുള്ള മത്സരപരീക്ഷകളിൽ പങ്കെടുക്കുന്ന ഉദ്യോഗാർത്ഥികൾക്ക് ആശ്വാസമേകി ഉയർന്ന പ്രായപരിധിയിൽ അഞ്ച് വർഷത്തെ ഇളവ് അനുവദിച്ച് മുഖ്യമന്ത്രി സി. ജോസഫ് വിജയ് ഉത്തരവിട്ടു. വിവിധ പരീക്ഷകൾക്ക് തയ്യാറെടുക്കുന്ന ഉദ്യോഗാർത്ഥികളുടെ ദീർഘനാളായുള്ള ആഗ്രഹങ്ങളും ആവശ്യങ്ങളും പരിഗണിച്ചാണ് ഈ നിർണായക തീരുമാനമെന്ന് സർക്കാർ വാർത്താക്കുറിപ്പിൽ വ്യക്തമാക്കി. ഈ ഇളവ് അടുത്ത അഞ്ച് വർഷത്തേക്ക് പ്രാബല്യത്തിലുണ്ടാകും. നിലവിൽ ഓരോ വിഭാഗത്തിനും അനുവദിച്ചിട്ടുള്ള ഉയർന്ന പ്രായപരിധിക്ക് പുറമെയായിരിക്കും അധികമായി ഈ അഞ്ച് വർഷത്തെ ആനുകൂല്യം ലഭിക്കുക.

ഉത്തരവ് പ്രകാരം സംസ്ഥാനത്തെ ഉയർന്ന തസ്തികകളായ ഗ്രൂപ്പ് I സർവീസുകളിൽ ജനറൽ വിഭാഗത്തിലെ ഉദ്യോഗാർത്ഥികൾക്കുള്ള ഉയർന്ന പ്രായപരിധി 32-ൽ നിന്ന് 37 വയസ്സായി ഉയരും. വിവിധ സംവരണ വിഭാഗക്കാർക്ക് നിലവിലുള്ള 37 വയസ്സെന്ന പരിധി 42 ആയും നിശ്ചയിച്ചിട്ടുണ്ട്. കൂടാതെ ഭിന്നശേഷി വിഭാഗത്തിലെ ജനറൽ ഉദ്യോഗാർത്ഥികളുടെ പ്രായപരിധി 42-ൽ നിന്ന് 47 ആയും, സംവരണ വിഭാഗങ്ങളിലെ ഭിന്നശേഷിക്കാർക്ക് 47-ൽ നിന്ന് 52 ആയും വർദ്ധിക്കും. ഗ്രൂപ്പ് II, IIA സർവീസുകളിൽ ജനറൽ വിഭാഗക്കാരുടെ പ്രായപരിധി 30-ൽ നിന്ന് 35 വയസ്സായും ഈ വിഭാഗത്തിലെ ഭിന്നശേഷിക്കാർക്ക് 40-ൽ നിന്ന് 45 വയസ്സായും ഉയർത്തിയിട്ടുണ്ട്. സമാനമായ ഇളവുകൾ മറ്റ് ഗ്രൂപ്പ് സർവീസുകൾക്കും ബാധകമാകുമെന്ന പ്രഖ്യാപനം സംസ്ഥാനത്തെ ലക്ഷക്കണക്കിന് ഉദ്യോഗാർത്ഥികൾക്കാണ് പ്രതീക്ഷ നൽകുന്നത്.