.jpg)
രാമക്ഷേത്ര സംഭാവനാ ക്രമക്കേട്; കുറ്റവാളികള് പല സത്യങ്ങളും വിളിച്ചു പറയുമെന്ന ഭയമാണ് മോദിക്ക്: ജയറാം രമേശ്
രാമക്ഷേത്രത്തിന്റെ പേരില് രാഷ്ട്രീയം കളിക്കുന്നവരുടെ യഥാര്ത്ഥ മുഖം ഓരോ ദിവസവും പുറത്തുവരുന്നെന്നായിരുന്നു അദ്ദേഹത്തിന്റെ വിമര്ശനം.
അയോധ്യ രാമക്ഷേത്ര സംഭാവന കൊള്ളയില് മോദി സര്ക്കാരിനെതിരെ വിമര്ശനവുമായി കോണ്ഗ്രസ്. പ്രധാനമന്ത്രി നരേന്ദ്ര മോദിയുടെ മൗനത്തെ ചോദ്യം ചെയ്ത് എഐസിസി ജനറല് സെക്രട്ടറി ജയറാം രമേശ് രംഗത്ത് വന്നു. രാമക്ഷേത്രത്തിന്റെ പേരില് രാഷ്ട്രീയം കളിക്കുന്നവരുടെ യഥാര്ത്ഥ മുഖം ഓരോ ദിവസവും പുറത്തുവരുന്നെന്നായിരുന്നു അദ്ദേഹത്തിന്റെ വിമര്ശനം. വന്കിട സ്രാവുകളെയും യഥാര്ത്ഥ കുറ്റവാളികളെയും സംരക്ഷിക്കാനാണ് കേന്ദ്ര-സംസ്ഥാന സര്ക്കാരുകളുടെ ശ്രമിക്കുന്നതെന്നും അദ്ദേഹം ആരോപിച്ചു. ചമ്പത് റായി അടക്കമുള്ളവര് പല സത്യങ്ങളും വിളിച്ചുപറയും എന്ന ഭയമാണ് മോദിക്കെന്നും ജയറാം രമേശിന്റെ ആരോപണമുണ്ടായി.
കഴിഞ്ഞ ദിവസം വിഷയത്തില് കേന്ദ്രസര്ക്കാരിനെതിരെ കെ സി വേണുഗോപാല് എംപിയും രംഗത്ത് വന്നിരുന്നു. രാജ്യത്തിന്റെ പ്രധാനമന്ത്രി നേരിട്ട് നിയമിച്ച ട്രസ്റ്റാണ് അവിടെ ഉള്ളത്. എന്നാല് ഇത്രയും വലിയ കൊള്ള നടന്നിട്ടും പ്രധാനമന്ത്രി മൗനം പാലിക്കുകയാണെന്നായിരുന്നു അദ്ദേഹം പ്രതികരിച്ചത്.
