.jpg)
പ്രതിസന്ധികള് ചര്ച്ച ചെയ്യാന് പ്രധാനമന്ത്രി വിളിച്ച മുഖ്യമന്ത്രിമാരുടെ യോഗം വൈകിട്ട്; സാഹചര്യം വിലയിരുത്തും
ഇന്ന് വൈകുന്നേരമാകും സംസ്ഥാന മുഖ്യമന്ത്രിമാരുമായുള്ള നരേന്ദ്ര മോദിയുടെ യോഗം.
പശ്ചിമേഷ്യന് സംഘര്ഷം രൂക്ഷമായി തുടരുന്ന സാഹചര്യത്തില് രാജ്യം നേരിടുന്ന പ്രതിസന്ധികള് ചര്ച്ച ചെയ്യാനായി പ്രധാനമന്ത്രിയുടെ നേതൃത്വത്തില് മുഖ്യമന്ത്രിമാരുടെ യോഗം ഇന്ന് നടക്കും. ഇന്ന് വൈകുന്നേരമാകും സംസ്ഥാന മുഖ്യമന്ത്രിമാരുമായുള്ള നരേന്ദ്ര മോദിയുടെ യോഗം. വീഡിയോ കോണ്ഫറന്സിലൂടെയാകും യോഗം ചേരുകയെന്ന് പ്രധാനമന്ത്രിയുടെ ഓഫീസ് അറിയിച്ചിട്ടുണ്ട്.
പശ്ചിമേഷ്യന് സംഘര്ഷത്തിന്റെ പശ്ചാത്തലത്തിലുള്ള തയാറെടുപ്പുകള് യോഗം വിലയിരുത്തും. ഊര്ജ പ്രതിസന്ധിയിലടക്കം സംസ്ഥാനങ്ങള് സ്വീകരിക്കേണ്ട നടപടികളും യോഗത്തില് ചര്ച്ചയാകും. ഒറ്റക്കെട്ടായി പ്രതിസന്ധിയെ നേരിടാനുള്ള ചര്ച്ചകള് നടത്തുകയാണ് യോഗത്തിന്റെ അജണ്ട. മുന്കരുതലായി സ്വീകരിക്കേണ്ട നടപടികളും, കൂടുതല് നിയന്ത്രണങ്ങള് ഏര്പ്പെടുത്തണമോ എന്ന കാര്യത്തിലും മുഖ്യമന്ത്രിമാരുമായുള്ള പ്രധാനമന്ത്രിയുടെ ചര്ച്ചയില് തീരുമാനമുണ്ടാകും. ഇന്ധന ലഭ്യത, വളം ലഭ്യത, അവശ്യ വസ്തു വിതരണം, ക്രമസമാധാനം ഉറപ്പാക്കല്, വിലക്കയറ്റ നിരീക്ഷണം എന്നീ കാര്യങ്ങളിലും വിശദമായ ചര്ച്ച നടക്കും. അതേസമയം തെരഞ്ഞെടുപ്പ് നടക്കുന്ന സംസ്ഥാനങ്ങളില് മാതൃക പെരുമാറ്റ ചട്ടം നിലവിലുള്ളതിനാല് മുഖ്യമന്ത്രിമാര് യോഗത്തില് പങ്കെടുക്കില്ല. ഈ സാഹചര്യത്തില് കേരളം അടക്കമുള്ള സംസ്ഥാനങ്ങളിലെ ചീഫ് സെക്രട്ടറിമാരുടെ പ്രത്യേക യോഗം ചേരുമെന്ന് പ്രധാനമന്ത്രിയുടെ ഓഫീസ് അറിയിച്ചിട്ടുണ്ട്.
