.jpg)
നീറ്റ് ചോദ്യപേപ്പര് ക്രമക്കേട്; ആസൂത്രിത ഗൂഢാലോചനയുണ്ടായി; എന്ടിഎയിലെ മൂന്ന് സബ്ജക്ട് വിദഗ്ധര്ക്ക് പങ്കുണ്ടെന്ന നിർണായക കണ്ടെത്തലുമായി സിബിഐ
ന്യൂഡല്ഹി: നീറ്റ് ചോദ്യപേപ്പര് ക്രമക്കേടിൽ നിർണ്ണായക കണ്ടെത്തലുമായി സിബിഐ.ചോദ്യപ്പേപ്പർ ചോർച്ചയ്ക്ക് പിന്നില് ആസൂത്രിത ഗൂഢാലോചനയുണ്ടായെന്നാണ് സിബിഐയുടെ കണ്ടെത്തല്. നാഷണല് ടെസ്റ്റിംഗ് ഏജന്സി (എന്ടിഎ) വിദഗ്ധര്ക്കും ചോര്ച്ചയില് നിര്ണായ പങ്കുണ്ടെന്നും സിബിഐ വ്യക്തമാക്കുന്നു. അവസാന നിമിഷം ചോദ്യപേപ്പര് ചോര്ന്നതല്ല, പകരം കൃത്യമായ ആസൂത്രണം ചോര്ച്ചയ്ക്ക് പിന്നിലുണ്ടെന്നാണ് സിബിഐയുടെ കണ്ടെത്തല്. ഡല്ഹിയിലെ പ്രത്യേക സിബിഐ കോടതിയില് സമര്പ്പിച്ച കുറ്റപത്രത്തിലാണ് സിബിഐ ഇക്കാര്യം വിശദീകരിക്കുന്നത്.
നാഷണല് ടെസ്റ്റിംഗ് ഏജന്സി (എന്ടിഎ) ഓഫീസില് നിന്ന് മൂന്ന് സബ്ജക്ട് വിദഗ്ധര് വ്യത്യസ്ത മാര്ഗ്ഗങ്ങളിലൂടെ പരീക്ഷാ ചോദ്യങ്ങള് പുറത്തെത്തിച്ചതായാണ് കണ്ടെത്തിയത്. ഒരാള് ചോദ്യങ്ങള് ചെറിയ കടലാസ് കഷണങ്ങളില് എഴുതി ഒളിപ്പിച്ചാണ് പുറത്തെത്തിച്ചത്. മറ്റ് രണ്ടുപേര് ചോദ്യങ്ങള് കാണാതെ പഠിച്ച് ഹോട്ടല് മുറികളിലെത്തി കടലാസില് എഴുതുകയോ എന്സിഇആര്ടി പാഠപുസ്തകങ്ങളില് അടയാളപ്പെടുത്തുകയോ ചെയ്തുവെന്നാണ് സിബിഐ കണ്ടെത്തിയിരിക്കുന്നത്.
എന്ടിഎ നിയോഗിച്ച ബയോളജി വിദഗ്ധന് മനീഷ ഗുരുനാഥ് മന്ധാരെ, കെമിസ്ട്രി വിദഗ്ധന് പ്രഹ്ലാദ് വിത്തല്റാവു കുല്ക്കര്ണി, ഫിസിക്സ് വിദഗ്ധ മനീഷ സഞ്ജയ് ഹവാല്ദര് എന്നിവരാണ് ഗൂഢാലോചനയില് പങ്കാളികളായത്. ഇവര് തങ്ങളുടെ ഔദ്യോഗിക പദവി ദുരുപയോഗം ചെയ്ത്, നീറ്റ് പരീക്ഷയ്ക്ക് മുമ്പ് ചോദ്യപേപ്പര് പുറത്തു കടത്തുകയായിരുന്നുവെന്ന് സിബിഐ വ്യക്തമാക്കുന്നു.