.jpg)
മുംബൈ വിമാനത്താവളം നാളെ അടച്ചിടും
മഴക്കാലത്ത് വിമാനങ്ങളുടെ സുരക്ഷിതമായ ലാൻഡിംഗും ടേക്ക് ഓഫും ഉറപ്പാക്കുന്നതിനായാണ് വിമാനത്താവളത്തില് തീവ്രമായ അറ്റകുറ്റപ്പണികള് നടത്തുന്നത്.
മുംബൈ: മണ്സൂണ് മുന്നൊരുക്കങ്ങളുടെ ഭാഗമായുള്ള അറ്റകുറ്റപ്പണികള്ക്കായി മുംബൈ അന്താരാഷ്ട്ര വിമാനത്താവളം മെയ് ഏഴിന് അടച്ചിടും.വ്യാഴാഴ്ച രാവിലെ 11 മണി മുതല് വൈകിട്ട് 5 മണി വരെയാണ് റണ്വേകളുടെ പ്രവർത്തനം നിർത്തിവെക്കുന്നത്.
ആഭ്യന്തര-അന്തർദേശീയ സർവീസുകളെ ഈ നിയന്ത്രണം ബാധിക്കാൻ സാധ്യതയുള്ളതിനാല്, യാത്രക്കാർ തങ്ങളുടെ വിമാന സമയവിവരങ്ങള് മുൻകൂട്ടി പരിശോധിച്ച് ഉറപ്പുവരുത്തണമെന്ന് അധികൃതർ നിർദ്ദേശിച്ചു.
മഴക്കാലത്ത് വിമാനങ്ങളുടെ സുരക്ഷിതമായ ലാൻഡിംഗും ടേക്ക് ഓഫും ഉറപ്പാക്കുന്നതിനായാണ് വിമാനത്താവളത്തില് തീവ്രമായ അറ്റകുറ്റപ്പണികള് നടത്തുന്നത്. മുൻകൂട്ടി നിശ്ചയിച്ച പ്രവൃത്തിയായതിനാല് വിമാനക്കമ്പനികള് സർവീസുകളില് നേരത്തെ തന്നെ മാറ്റം വരുത്തി.
നിരവധി വിമാനങ്ങള് റദ്ദാക്കിയതിനെ തുടർന്ന് എയർലൈനുകളുമായി ബന്ധപ്പെട്ട് കൃത്യമായ സമയം യാത്രക്കാർ പരിശോധിക്കേണ്ടതാണെന്ന് അധികൃതർ അറിയിച്ചു.
യാത്രാ വിമാനങ്ങള്ക്ക് പുറമെ ചരക്ക് നീക്കങ്ങളെയും ഈ നിയന്ത്രണം ബാധിക്കും. ആയതിനാല് ചരക്ക് നീക്കം നടത്തുന്നവരും അസൗകര്യങ്ങള് ഒഴിവാക്കാൻ വിമാന സമയക്രമം മുൻകൂട്ടി പരിശോധിക്കണമെന്ന് എയർപോർട്ട് അധികൃതർ സർക്കുലറിലൂടെ അറിയിച്ചു.