ജെഇഇ മെയിൻ 2026 സെഷൻ 2 ഫലം പ്രസിദ്ധീകരിച്ചു

നാഷണൽ ടെസ്റ്റിങ് ഏജൻസി ജെഇഇ മെയിൻ 2026 സെഷൻ 2 പരീക്ഷാ ഫലം ഔദ്യോഗികമായി പ്രഖ്യാപിച്ചു. പരീക്ഷ എഴുതിയ ഉദ്യോഗാർത്ഥികൾക്ക് ഔദ്യോഗിക വെബ്‌സൈറ്റായ jeemain.nta.nic.in സന്ദർശിച്ച് തങ്ങളുടെ സ്കോർകാർഡുകൾ പരിശോധിക്കാവുന്നതാണ്. ഏപ്രിൽ 2 മുതൽ 8 വരെ നടന്ന പരീക്ഷയിൽ ഏകദേശം 11 ലക്ഷത്തോളം വിദ്യാർത്ഥികളാണ് പങ്കെടുത്തത്. ഇന്ത്യയിലെ 304 നഗരങ്ങളിലും വിദേശത്തെ 14 നഗരങ്ങളിലുമായി സജ്ജീകരിച്ച 566 പരീക്ഷാ കേന്ദ്രങ്ങളിലായിരുന്നു പരീക്ഷാ നടപടികൾ പൂർത്തിയായത്.

രണ്ടാം സെഷൻ ഫലത്തിൽ മികച്ച നേട്ടമാണ് വിദ്യാർത്ഥികൾ കൈവരിച്ചിരിക്കുന്നത്. ആകെ 26 വിദ്യാർത്ഥികൾ 100 ശതമാനം സ്കോർ കരസ്ഥമാക്കി. ഇതിൽ 24 പേർ ജനറൽ വിഭാഗത്തിൽ നിന്നുള്ളവരും ഓരോരുത്തർ വീതം ഇഡബ്ല്യുഎസ്, ഒബിസി വിഭാഗങ്ങളിൽ നിന്നുള്ളവരുമാണ്. ആദ്യ സെഷനിൽ 12 പേർക്കായിരുന്നു 100 ശതമാനം സ്കോർ ലഭിച്ചിരുന്നത്. ഈ സ്കോറുകൾ ഉപയോഗിച്ച് രാജ്യത്തെ പ്രമുഖ സർക്കാർ-സ്വകാര്യ സ്ഥാപനങ്ങളിലെ ബി.ഇ/ബി.ടെക്, ബി.ആർക്, ബി.പ്ലാനിങ് കോഴ്സുകളിലേക്ക് പ്രവേശനം നേടാൻ സാധിക്കും.

ജെഇഇ മെയിൻ പരീക്ഷയിൽ നിശ്ചിത കട്ട്-ഓഫ് മാർക്ക് നേടി യോഗ്യത നേടുന്നവർക്ക് ഐഐടികളിലേക്കുള്ള പ്രവേശന പരീക്ഷയായ ജെഇഇ അഡ്വാൻസ്ഡിന് അപേക്ഷിക്കാം. മെയ് 17-നാണ് ജെഇഇ അഡ്വാൻസ്ഡ് പരീക്ഷ നിശ്ചയിച്ചിരിക്കുന്നത്. അഡ്വാൻസ്ഡ് പരീക്ഷയിലേക്കുള്ള യോഗ്യതയ്ക്കൊപ്പം, ജോസ കൗൺസിലിംഗിൽ പങ്കെടുക്കാനുള്ള മാനദണ്ഡവും മെയിൻ പരീക്ഷയിലെ സ്കോറാണ്. എൻജിനീയറിങ് സ്ഥാപനങ്ങളിലേക്കുള്ള സീറ്റ് വിതരണം ഈ കേന്ദ്രീകൃത കൗൺസിലിങ് പ്രക്രിയയിലൂടെയാണ് നടക്കുക.

ഫലം അറിയാനായി വിദ്യാർത്ഥികൾ വെബ്സൈറ്റിലെ ലിങ്കിൽ ക്ലിക്ക് ചെയ്ത് അപേക്ഷാ നമ്പറും ജനനത്തീയതിയും നൽകി ലോഗിൻ ചെയ്യേണ്ടതാണ്. ജോയിന്റ് സീറ്റ് അലോക്കേഷൻ അതോറിറ്റിയുടെ കൗൺസിലിങ് നടപടികൾ ഉടൻ ആരംഭിക്കും. ഇതിനായി വിദ്യാർത്ഥികൾ ഓൺലൈനായി രജിസ്റ്റർ ചെയ്യുകയും താൽപ്പര്യമുള്ള കോളേജുകളും കോഴ്സുകളും മുൻഗണനാക്രമത്തിൽ രേഖപ്പെടുത്തുകയും വേണം. അഖിലേന്ത്യാ റാങ്ക് അടിസ്ഥാനമാക്കിയായിരിക്കും വിവിധ റൗണ്ടുകളിലായി സീറ്റുകൾ അനുവദിക്കുക.