വിദേശമണ്ണിൽ ആഭ്യന്തര കാര്യങ്ങൾ ചർച്ചചെയ്യാൻ ഇന്ദിര ഗാന്ധി പോലും തയാറായിരുന്നില്ല : രാഹുലിനെ വിമർശിച്ച് അമിത് ഷാ

ന്യൂഡൽഹി: രാഹുൽ ഗാന്ധിയുടെ ലണ്ടൻ പ്രസംഗത്തിന്റെ പേരിൽ സ്തംഭനാവസ്ഥയിലായ പാർലമെന്റിലെ ഇപ്പോഴത്തെ അവസ്ഥ ചർച്ചയിലൂടെ മാത്രമേ പരിഹരിക്കാൻ കഴിയൂവെന്ന് കേന്ദ്ര ആഭ്യന്തരമന്ത്രി അമിത് ഷാ. എന്നാൽ ​പ്രതിപക്ഷം ചർച്ചക്ക് മുന്നോട്ടുവന്നാൽ മാത്രമേ അത് സാധിക്കുകയുള്ളൂ. അവർ ഒരു ചുവട് മുന്നോട്ടുവെച്ചാൽ സർക്കാർ രണ്ടു ചുവട് മുന്നോട്ട് വെക്കുമെന്നും അമിത് ഷാ വ്യക്തമാക്കി. ഡൽഹിയിൽ നടന്ന ഇന്ത്യ ടുഡെ കോൺക്ലെവിൽ സംസാരിക്കുകയായിരുന്നു അദ്ദേഹം. ചില പ്രശ്നങ്ങൾ രാഷ്ട്രീയത്തിനും അതീതമാണ്. വിദേശമണ്ണിൽ ആഭ്യന്തര കാര്യങ്ങൾ ചർച്ചചെയ്യാൻ പ്രധാനമന്ത്രി ഇന്ദിര ഗാന്ധി പോലും തയാറായിരുന്നില്ല എന്ന കാര്യവും അമിത് ഷാ ചൂണ്ടിക്കാട്ടി.