.jpg)
യുഎസുമായി കച്ചവടത്തിന് ഇന്ത്യ ; ജിഎം ഉല്പ്പന്നങ്ങള്ക്ക് വിലക്ക്, ചായയ്ക്കും കാപ്പിക്കും വന് ഇളവ്
ഇന്ത്യയും അമേരിക്കയും തമ്മിലുള്ള വ്യാപാരബന്ധത്തില് ചരിത്രം കുറിച്ചുകൊണ്ട് 500 ബില്യണ് ഡോളറിന്റെ താല്ക്കാലിക വ്യാപാര കരാര് യാഥാര്ത്ഥ്യമായിരിക്കുകയാണ്. രാജ്യത്തെ കര്ഷകരുടെയും ചെറുകിട വ്യവസായങ്ങളുടെയും താല്പ്പര്യങ്ങള് പൂര്ണ്ണമായി സംരക്ഷിച്ചുകൊണ്ട്, തിരഞ്ഞെടുത്ത മേഖലകളില് മാത്രം ഇളവുകള് നല്കുന്ന രീതിയാണ് കരാറില് സ്വീകരിച്ചിരിക്കുന്നതെന്നാണ് കേന്ദ്ര വാണിജ്യ മന്ത്രി പിയൂഷ് ഗോയല് വ്യക്തമാക്കിയിരിക്കുന്നത്.
അമേരിക്കയില് നിന്നുള്ള ചില ഉല്പ്പന്നങ്ങള്ക്ക് ഇന്ത്യ തീരുവ ഇളവ് നല്കിയിട്ടുണ്ട്. പ്രധാനമായും കാലിത്തീറ്റയായി ഉപയോഗിക്കുന്ന 'ഡിസ്റ്റിലേഴ്സ് ഡ്രൈഡ് ഗ്രെയിന്സ് വിത്ത് സോല്യൂബിള്സ്' ഇനി മുതല് തീരുവയില്ലാതെ ഇന്ത്യയിലേക്ക് ഇറക്കുമതി ചെയ്യാം. ഇതുകൂടാതെ കരാറിലെ പ്രധാന കാര്യങ്ങള് താഴെ പറയുന്നവയാണ്:
മദ്യവും സൗന്ദര്യവര്ദ്ധക വസ്തുക്കളും: വിദേശ മദ്യങ്ങള്ക്കും വൈനുകള്ക്കും കുറഞ്ഞ ഇറക്കുമതി വില നിശ്ചയിച്ചുകൊണ്ട് വിപണിയില് പ്രവേശനം അനുവദിച്ചു. വിപണിയില് മത്സരം വര്ദ്ധിപ്പിക്കുന്നതിനായി കോസ്മെറ്റിക്സ് ഉല്പ്പന്നങ്ങള്ക്കും ഇളവുണ്ട്.
സാങ്കേതിക വിദ്യ: കമ്പ്യൂട്ടര് അനുബന്ധ ഉല്പ്പന്നങ്ങള്ക്കും ഫൈബര്സ്കോപ്പ്, ലാപ്രോസ്കോപ്പ് തുടങ്ങിയ മെഡിക്കല് ഉപകരണങ്ങള്ക്കും കുറഞ്ഞ നിരക്കില് വിപണി പ്രവേശനം നല്കും.
കാര്ഷിക മേഖലയില് 'റെഡ് ലൈന്'; വിട്ടുവീഴ്ചയില്ല
ഇന്ത്യയുടെ കാര്ഷിക മേഖലയെ കരാര് ദോഷകരമായി ബാധിക്കില്ലെന്ന് പിയൂഷ് ഗോയല് ഉറപ്പുനല്കി. പ്രധാനപ്പെട്ട പല നിയന്ത്രണങ്ങളും ഇന്ത്യ നിലനിര്ത്തിയിട്ടുണ്ട്:
ജിഎം ഉല്പ്പന്നങ്ങള്ക്ക് വിലക്ക്: അമേരിക്കയില് നിന്നുള്ള ജനിതക മാറ്റം വരുത്തിയ ഉല്പ്പന്നങ്ങള് ഇന്ത്യ അനുവദിക്കില്ല.
അരിയും ഗോതമ്പും സുരക്ഷിതം: അരി, ഗോതമ്പ്, ചോളം, റാഗി, തിനകള് തുടങ്ങിയ ധാന്യങ്ങളും വാഴപ്പഴം, സിട്രസ് പഴങ്ങള്, കടല, പഞ്ചസാര, സോയാബീന് എന്നിവയും നികുതി ഇളവുകളുടെ പരിധിയില് വരില്ല.
മറ്റ് ഒഴിവാക്കിയവ: ഇറച്ചി, കോഴി ഉല്പ്പന്നങ്ങള്, പാല് ഉല്പ്പന്നങ്ങള്, എഥനോള്, പുകയില എന്നിവയും കരാറില് നിന്ന് ഒഴിവാക്കി. കര്ഷകര്, എംഎസ്എംഇ മേഖല, കൈത്തറി - കരകൗശല തൊഴിലാളികള് എന്നിവരുടെ താല്പ്പര്യങ്ങള് സംരക്ഷിക്കപ്പെടുമെന്നും മന്ത്രി പറഞ്ഞു.
കയറ്റുമതിയില് ഇന്ത്യയ്ക്ക് വന് നേട്ടം
കരാറിലൂടെ ഇന്ത്യന് ഉല്പ്പന്നങ്ങള്ക്ക് അമേരിക്കന് വിപണിയില് വലിയ സാധ്യതകളാണ് തുറക്കുന്നത്. നിരവധി ഉല്പ്പന്നങ്ങള്ക്ക് ഇനി മുതല് അമേരിക്കയില് അധിക തീരുവ നല്കേണ്ടതില്ല.
കാര്ഷിക ഉല്പ്പന്നങ്ങള്: ചായ, കാപ്പി, മസാലകള്, വെളിച്ചെണ്ണ, കശുവണ്ടി, മാങ്ങ, പേരയ്ക്ക, പപ്പായ, കൈതച്ചക്ക, കൂണ്, കൊക്കോ ഉല്പ്പന്നങ്ങള് തുടങ്ങിയവയ്ക്ക് തീരുവ ഇല്ലാതെ അമേരിക്കയിലേക്ക് കയറ്റി അയയ്ക്കാം.