.jpg)
'സെന്സോഡൈനിന്റെ' പേരില് വ്യാജ ഉല്പ്പന്നങ്ങള്; വന് സംഘത്തെ പിടികൂടി
റെയ്ഡില് ലക്ഷക്കണക്കിന് രൂപ വിലമതിക്കുന്ന സാധനങ്ങളാണ് പോലീസ് പിടിച്ചെടുത്തത്. ഏകദേശം 1,800 ഓളം നിറച്ച വ്യാജ സെന്സോഡൈന് ട്യൂബുകള്, 10,000-ലധികം ഒഴിഞ്ഞ ട്യൂബുകള്,
ന്യൂ ഡല്ഹി: പ്രമുഖ ടൂത്ത്പേസ്റ്റ് ബ്രാന്ഡായ 'സെന്സോഡൈനിന്റെ' പേരില് വ്യാജ ഉല്പ്പന്നങ്ങള് നിര്മ്മിച്ച് വില്പന നടത്തിയിരുന്ന വന് സംഘത്തെ ഡല്ഹി പോലീസ് ക്രൈം ബ്രാഞ്ച് പിടികൂടി. സംഭവവുമായി ബന്ധപ്പെട്ട് യൂണിറ്റ് നടത്തിപ്പുകാരനായ ഹരി ഓം മിശ്രയെ (58) പോലീസ് അറസ്റ്റ് ചെയ്തു.
റെയ്ഡില് ലക്ഷക്കണക്കിന് രൂപ വിലമതിക്കുന്ന സാധനങ്ങളാണ് പോലീസ് പിടിച്ചെടുത്തത്. ഏകദേശം 1,800 ഓളം നിറച്ച വ്യാജ സെന്സോഡൈന് ട്യൂബുകള്, 10,000-ലധികം ഒഴിഞ്ഞ ട്യൂബുകള്, പാക്ക് ചെയ്ത നിലയിലുള്ള 1,200 ട്യൂബുകള്, ഡ്രമ്മുകളില് സൂക്ഷിച്ചിരുന്ന 130 കിലോ നീല നിറത്തിലുള്ള അസംസ്കൃത പേസ്റ്റ്, ട്യൂബുകളില് പേസ്റ്റ് നിറയ്ക്കാനും സീല് ചെയ്യാനുമുള്ള യന്ത്രങ്ങള്, സെന്സോഡൈന് ബ്രാന്ഡ് പേരുള്ള പാക്കിംഗ് കവറുകള്, ബോക്സുകള്, പശ തോക്കുകള് എന്നിവ പിടികൂടി.
ക്രൈം ബ്രാഞ്ചിന്റെ ഇആര്-1 വിഭാഗത്തിന് ലഭിച്ച രഹസ്യവിവരത്തെത്തുടര്ന്നാണ് ഖഞ്ജവാലയിലെ ഗോഡൗണില് പരിശോധന നടത്തിയത്. അതീവ മോശമായ സാഹചര്യത്തില് നിര്മ്മിക്കുന്ന ഇത്തരം വ്യാജ ഉല്പ്പന്നങ്ങള് ഉപഭോക്താക്കളുടെ ആരോഗ്യത്തിന് ഗുരുതരമായ ഭീഷണിയുയര്ത്തുന്നതായി പോലീസ് മുന്നറിയിപ്പ് നല്കി. പ്രാദേശിക വിപണികളിലേക്കാണ് ഇവ പ്രധാനമായും വിതരണം ചെയ്തിരുന്നത്. പ്രതി ഹരി ഓം മിശ്ര കുറ്റം സമ്മതിച്ചതായും പോലീസ് അറിയിച്ചു.
ഭാരതീയ ന്യായ സംഹിത, പകര്പ്പവകാശ നിയമം എന്നിവ പ്രകാരമാണ് കേസ് രജിസ്റ്റര് ചെയ്തിരിക്കുന്നത്. ഡല്ഹിയില് വ്യാജ ഉപഭോക്തൃ ഉല്പ്പന്നങ്ങള്ക്കെതിരെ നടക്കുന്ന വ്യാപകമായ പരിശോധനകളുടെ ഭാഗമായാണ് ഈ നടപടി. ഇതേ ദിവസം തന്നെ ദ്വാരകയില് കാലാവധി കഴിഞ്ഞ ഭക്ഷ്യവസ്തുക്കള് റീപാക്ക് ചെയ്ത് വില്ക്കുന്ന മറ്റൊരു സംഘത്തെയും പോലീസ് പിടികൂടിയിട്ടുണ്ട്.