.jpg)
കുളിക്കുന്നതിനിടെ യുവതിയുടെ ദൃശ്യങ്ങള്‍ പകര്‍ത്താന്‍ ശ്രമം ; അയോധ്യ രാമ ക്ഷേത്രത്തിന് സമീപത്തെ ഗസ്റ്റ് ഹൗസ് ജീവനക്കാരന്‍ അറസ്റ്റില്‍
25കാരനായ സൗരഭ് തിവാരിയാണ് അറസ്റ്റിലായത്.
കുളിക്കുന്നതിനിടെ യുവതിയുടെ ദൃശ്യങ്ങള്‍ പകര്‍ത്താന്‍ ശ്രമിച്ച ഗസ്റ്റ് ഹൗസ് ജീവനക്കാരന്‍ അറസ്റ്റിലായി. അയോധ്യ രാമ ക്ഷേത്രത്തിന് സമീപത്തെ ഒരു ഹോട്ടലിലാണ് സംഭവം. യുവതിയുടെ ദൃശ്യങ്ങള്‍ പകര്‍ത്തുന്നതിനിടെ ഇയാളെ കൈയോടെ പിടികൂടുകയായിരുന്നു. തുടര്‍ന്ന് ഇയാളുടെ മൊബൈല്‍ ഫോണ്‍ പരിശോധിച്ചപ്പോള്‍ ഇവിടെ താമസിച്ചിരുന്ന നിരവധി പേരുടെ നഗ്‌ന ദൃശ്യങ്ങള്‍ അതില്‍ നിന്ന് കണ്ടെത്തി.
25കാരനായ സൗരഭ് തിവാരിയാണ് അറസ്റ്റിലായത്. ഉത്തര്‍പ്രദേശിലെ ബറൈച് സ്വദേശിയാണിയാള്‍. ഹോട്ടലില്‍ താമസിച്ചിരുന്ന സത്രീകളുടെ ദൃശ്യങ്ങളാണ് ഇയാള്‍ പകര്‍ത്തിയവയില്‍ ഏറെയും. അയോധ്യ രാമ ക്ഷേത്രത്തിന്റെ മൂന്നാം ഗേറ്റില്‍ നിന്ന് 50 മീറ്റര്‍ മാത്രം അകലെ പ്രവര്‍ത്തിക്കുന്ന രാജ ഗസ്റ്റ് ഹൗസിലെ ജീവനക്കാരനായിരുന്നു ഇയാള്‍. കുളിക്കുകയായിരുന്ന യുവതിയുടെ ദൃശ്യങ്ങള്‍ പകര്‍ത്തുന്നതിനിടെ താമസക്കാര്‍ തന്നെയാണ് ഇയാളെ പിടികൂടി പൊലീസില്‍ ഏല്‍പ്പിച്ചത്.
വരാണസി സ്വദേശിനിയായ ഒരു തീര്‍ത്ഥാടക കുളിക്കുന്നതിനിടെ നിഴല്‍ കണ്ടാണ് യുവാവിന്റെ സാന്നിദ്ധ്യം ശ്രദ്ധിച്ചത്. നോക്കിയപ്പോള്‍ മുകളില്‍ നിന്ന് ഇയാള്‍ കുളിക്കുന്ന ദൃശ്യങ്ങള്‍ പകര്‍ത്തുന്നത് കണ്ടു. ഭയന്നുപോയ യുവതി നിലവിളിച്ചുകൊണ്ട് ബാത്ത്‌റൂമില്‍ നിന്ന് പുറത്തേക്കിറങ്ങി. മറ്റ് മുറികളില്‍ താമസിച്ചിരുന്ന പുരുഷന്മാര്‍ യുവതിയുടെ കരച്ചില്‍ കേട്ട് ഓടിയെത്തുകയും കാര്യമറിഞ്ഞ് ഇയാളെ പിടികൂടുകയുമായിരുന്നു.
രാമ ജന്മഭൂമി പൊലീസ് സ്ഥലത്തെത്തി ഇയാളെ കസ്റ്റഡിയിലെടുത്തു. ശേഷം ഫോണ്‍ പരിശോധിച്ചപ്പോഴാണ് പൊലീസുകാരെ ഞെട്ടിച്ച് നിരവധിപ്പേരുടെ നഗ്‌നദൃശ്യങ്ങള്‍ അതില്‍ കണ്ടെത്തിയത്.
അതേസമയം ഗസ്റ്റ് ഹൗസ് നിര്‍മിച്ചത് അനധികൃതമാണെന്ന് കാണിച്ച് അയോദ്ധ്യ വികസന അതോറിറ്റി കെട്ടിടം സീല്‍ ചെയ്തിട്ടുമുണ്ട്. പ്രതിയായ യുവാവ് എത്ര നാളായി ഇങ്ങനെ ദൃശ്യങ്ങള്‍ പകര്‍ത്താന്‍ തുടങ്ങിയിട്ടെന്നും മറ്റാര്‍ക്കെങ്കിലും ഇവ വിതരണം ചെയ്തിട്ടുണ്ടോയെന്നും അന്വേഷിക്കുന്നതായി പൊലീസ് അറിയിച്ചു.
