പതിനെട്ടാമത് ബ്രിക്സ് ഉച്ചകോടി വൻ വിജയം; ലോകരാജ്യങ്ങൾക്ക് ഇന്ത്യക്ക് മേലുള്ള വിശ്വാസം വർദ്ധിച്ചുവെന്ന് പ്രധാനമന്ത്രി നരേന്ദ്രമോദി

ദില്ലി : പതിനെട്ടാമത് ബ്രിക്സ് ഉച്ചകോടി വൻ വിജയമായി മാറിയെന്നും, ലോകരാജ്യങ്ങൾക്ക് ഇന്ത്യക്ക് മേലുള്ള വിശ്വാസം വർദ്ധിച്ചുവെന്നും പ്രധാനമന്ത്രി പറഞ്ഞു. എല്ലാവരുടെയും പിന്തുണയോടെ സംയുക്ത പ്രസ്താവന അംഗീകരിക്കപ്പെട്ടത് ഇന്ത്യയുടെ ആഗോള വിശ്വാസ്യതയുടെ മറ്റൊരു തെളിവാണെന്ന് പ്രധാനമന്ത്രി പറഞ്ഞു. സെമികോൺ ഇന്ത്യ ഉദ്ഘാടന ചടങ്ങിലാണ് പ്രധാനമന്ത്രിയുടെ പരാമർശം.പശ്ചിമേഷ്യൻ പ്രതിസന്ധിയുടെ കാര്യത്തിൽ ഇറാനും യുഎഇയും തമ്മിൽ അഭിപ്രായവ്യത്യാസങ്ങൾ നിലനിന്നിരുന്നിട്ടും, അംഗരാജ്യങ്ങൾ ഒരു സംയുക്ത പ്രഖ്യാപനം അംഗീകരിച്ച കഴിഞ്ഞ ആഴ്ചയിലെ ബ്രിക്‌സ് ഉച്ചകോടിയിലെ സമവായത്തെക്കുറിച്ചാണ് മോദി പരാമർശിച്ചത്. 

വെല്ലുവിളികൾക്കിടയിലും ഏറ്റവും പുതിയ ജിഡിപി കണക്കുകളിൽ 7.8 ശതമാനം വളർച്ച രേഖപ്പെടുത്തിക്കൊണ്ട് ഇന്ത്യൻ സമ്പദ്‌വ്യവസ്ഥ കരുത്ത് തെളിയിക്കുന്നത് തുടരുകയാണെന്ന് പ്രധാനമന്ത്രി മോദി പറഞ്ഞു.സൂറത്തിലും മൊഹാലിയിലും രണ്ട് പുതിയ സെമികണ്ടക്ടർ പ്ലാന്റുകൾ സ്ഥാപിച്ചതായി പ്രധാനമന്ത്രി പറഞ്ഞു. “ഇന്ത്യ സെമികണ്ടക്ടർ മിഷന്റെ രണ്ടാം ഘട്ടം ആരംഭിച്ചിരിക്കുന്നു. ഇന്ത്യയുടെ സെമികണ്ടക്ടർ മേഖല അതിവേഗം വികസിച്ചുകൊണ്ടിരിക്കുകയാണ്. ഇത് നൂതനാശയങ്ങൾക്കും നിക്ഷേപത്തിനും വളർച്ചയ്ക്കും പുതിയ അവസരങ്ങൾ തുറന്നുതരുന്നു,” അദ്ദേഹം പറഞ്ഞു.

 നൂറ്റാണ്ടുകൾ പഴക്കമുള്ള ഇന്ത്യയുടെ നൂതനാശയ പാരമ്പര്യവും, ഇരുപത്തിയൊന്നാം നൂറ്റാണ്ടിലെ സാങ്കേതികവിദ്യയും കാഴ്ചപ്പാടും സ്വീകരിക്കാനുള്ള സന്നദ്ധതയും ഒത്തുചേർന്ന് ‘ആത്മനിർഭർ ഭാരത്’, ‘വികസിത് ഭാരത്’ എന്നിവ കെട്ടിപ്പടുക്കുന്നതിന് ഊർജ്ജം പകരുന്നുവെന്ന് പ്രധാനമന്ത്രി മോദി പറഞ്ഞു.