പഞ്ചസാര അമിതമായി കഴിച്ചാൽ ...

പഞ്ചസാര ഉപയോഗിക്കാത്തവരായിട്ട് ആരാണുള്ളത്. ഇന്ന് എല്ലാവരും പഞ്ചസാര ഉപയോഗിക്കുന്നവരാണ്. ചായയ്ക്കാണെങ്കിലും സ്നാക്സിനാണെങ്കിലും മറ്റും എന്തിനാണെങ്കിലും മധുരം ഉപയോഗിക്കുന്നവരാണ് നമ്മളിൽ മിക്കവരും. പലരും ചായ കുടിക്കുമ്പോൾ അമിതമായി പഞ്ചസാര ഉപയോഗിക്കുന്നത് കാണാം. എത്രത്തോളം മധുരം കഴിച്ചാലും മതിവരാത്തവരും നമുക്കിടയിലുണ്ട്. എന്നാൽ ഇത്തരത്തിൽ മധുരം കഴിക്കുന്നത് നിങ്ങളിൽ എത്രത്തോളം ആരോഗ്യ പ്രശ്നങ്ങൾ ഉണ്ടാക്കുന്നുണ്ട് എന്നറിയുമോ?

ക്യാൻസർ ബാധിച്ചവർ അമിതമായി പഞ്ചസാര ഉപയോഗിക്കരുത്. കാരണം, ക്യാൻസർ സെല്ലുകളെ വളരാൻ സഹായിക്കുന്ന ഒന്നാണ് പഞ്ചസാര. അത് കൊണ്ട് തന്നെ പഞ്ചസാരയുടെ ഉപയോഗം അമിതമായാല്‍ ക്യാന്‍സര്‍ സെല്ലുകള്‍ വളരാന്‍ ഇത് ഇടയാക്കും എന്ന് പഠനങ്ങളിൽ പറയുന്നു. നേച്ചര്‍ കമ്മ്യൂണിക്കേഷന്‍ എന്ന മാസികയാണ് റിപ്പോര്‍ട്ട് പുറത്തുവിട്ടിരിക്കുന്നത്. യീസ്റ്റിന്‍റെ ഫെര്‍മെന്‍റേഷന്‍ പ്രക്രിയ നടക്കുമ്പോള്‍ സെല്ലുകള്‍ വളരുകയും വര്‍ധിക്കുകയും ചെയ്യുന്നുണ്ടെന്നാണ് പഠനത്തിൽ വ്യക്തമാക്കുന്നത്.

അമിതമായി പഞ്ചസാക കഴിക്കുന്നവരിൽ ഹൃദ്രോഗം വരാനുള്ള സാധ്യത കൂടുതലാണ്. മധുര പാനീയങ്ങളിലും മറ്റും കലോറിയുടെ അളവ് വളരെ കൂടുതലാണ്. ഇത്തരത്തിൽ പഞ്ചസാര അമിതമായി കഴിക്കുന്നത് ഹൃദയ സംബന്ധിമായ അസുഖങ്ങൾ പിടിപെടാൻ കാരണമായിത്തീരും എന്ന് പഠനങ്ങൾ വ്യക്തമാക്കുന്നു. അത് കൊണ്ട് തന്നെ പഞ്ചസാര അമിതമായി ഉപയോഗിക്കുന്നവർ ശ്രദ്ധിച്ച് വേണം. മാത്രമല്ല പഞ്ചസാരമൂലം ഉണ്ടാകുന്ന ആരോഗ്യ പ്രശ്നങ്ങൾ അറിഞ്ഞിരിക്കുകയും വേണം.

അമിതമായ അളവില്‍ പഞ്ചസാര ഉപയോഗിച്ചാല്‍ പ്രോട്ടീനുകളെ ബാധിക്കും. അത് കൊണ്ട് തന്നെ പഞ്ചസാരയുടെ ഉപയോഗം പരമാവധി കുറക്കാൻ ശ്രദ്ധിക്കുക. രക്തത്തിലെ പ്രധാനപ്പെട്ട രണ്ട് പ്രോട്ടീനുകണ് ആല്‍ബുമിന്‍, ലിപോപ്രോട്ടീന്‍സ്. ഇവയുടെ പ്രവർത്തനങ്ങൾ അമിതമായ പഞ്ചസാര ഉപയോഗം ഇല്ലാതാക്കും. കൂടാതെ ശരീരത്തില്‍ കൊഴുപ്പും കൊളസ്‌ട്രോളും അടിഞ്ഞുകൂടാന്‍ ഇത്തരത്തിൽ അമിതമായി പഞ്ചസാര കഴിക്കുന്നത് കാരണമാകും.

കുട്ടികളുടെയൊക്കെ പല്ല് കണ്ടിട്ടില്ലേ, കേടായി ഇടക്കിടെ കൊഴിഞ്ഞു പോകുന്നത്. പലപ്പോഴും അമിതമായി മധുരം കഴിക്കുന്നത് കൊണ്ടാകും ഇത്തരത്തിൽ പല്ലുകൾ പെട്ടെന്ന് തന്നെ കേടാകുന്നത്. അമിതമായ അളവിൽ മധുരം ചേർത്ത് കാപ്പിയോ ചായയോ കുടിക്കുന്ന ശീലം ചിലർക്കുണ്ട്. ഇത്തരത്തിലുള്ളവരുടെ പല്ലുകളും വളരെ പെട്ടെന്ന് തന്നെ കേടാകാനുള്ള സാധ്യതയുണ്ട്. അമിതമായ അളവില്‍ മധുരംചേര്‍ത്ത കാപ്പി കുടിക്കുന്നവരുടെ പല്ലുകൾ പെട്ടെന്ന് ദ്രവിക്കാൻ സാധ്യതയുണ്ട്. കാപ്പി കുടിച്ചശേഷം ശരിയായി വായ് കഴുകുവാന്‍ ശ്രദ്ധിക്കുക. അല്ലെങ്കില്‍ പല്ലിനു കറ പിടിക്കുവാനും പോട് വരുവാനുമുള്ള സാധ്യത ഏറെയാണ് എന്ന് അറിഞ്ഞിരിക്കുക.

ഗർഭകാലത്ത് അമിതമായി പഞ്ചസാര ഉപയോഗിക്കുന്നത് അത്ര നല്ലതല്ലെന്നാണ് പഠനങ്ങൾ പറയുന്നത്. കാരണം ഗര്‍ഭകാലത്ത് പഞ്ചസാര അമിതമായി ഉപയോഗിച്ചാല്‍, ഗര്‍ഭസ്ഥശിശുവിന്റെ പേശീവളര്‍ച്ചയെ സാരമായി ബാധിക്കും. ഇത് പിന്നീട് പ്രസവിച്ച ശേഷം കുട്ടിക്ക് ആരോഗ്യ പ്രശ്നങ്ങൾ ഉണ്ടാക്കാനുള്ള സാധ്യത വർധിപ്പിക്കും. അത് കൊണ്ട് തന്നെ ഗർഭിണികൾ അമിതമായി പഞ്ചസാര ഉപയോഗിക്കുന്നത് അത്ര നല്ലതല്ല. പരമാവധി ഒഴിവാക്കുന്നതാണ് നല്ലത്.