കരുത്തുറ്റ മുടിക്ക് ആഴ്ചയിൽ എത്ര തവണ ഷാംപൂ ചെയ്യണം?

ഓരേ ഷാംപൂവോ എണ്ണയോ എല്ലാവർക്കും വർക്ക് ആകണമെന്നില്ല. ഓരോരുത്തരുടെയും മുടിയുടെ ഘടനയും പ്രകൃതവും വ്യത്യസ്ഥമാണ്. അത് തിരിച്ചറിഞ്ഞു വേണം മുടിയെ പരിചരിക്കാൻ.

എണ്ണമയമുള്ള മുടിക്ക്

ശിരോചർമത്തിൽ അമിതമായി സെബം ഉൽപ്പാദിപ്പിക്കപ്പെടുന്നതാണ് മുടിയിൽ എണ്ണമയം കൂടാൻ കാരണമാകുന്നത്. മുടിയുടെ സ്വഭാവിക ആരോ​ഗ്യത്തിന് സെബം ആവശ്യമാണെങ്കിലും അമിതമായാൽ ചെളിയും അഴുക്കും താരനുമൊക്കെ അടിഞ്ഞുകൂടാനും അസ്വസ്ഥത ഉണ്ടാക്കാനും കാരണമാകും.

മുടി കഴുകുന്ന രീതി: ആഴ്ചയിൽ മൂന്നോ നാലോ തവണ വീര്യം കുറഞ്ഞ ഷാംപൂ ഉപയോഗിച്ച് കഴുകുക. തലയോട്ടിയിലെ അധിക എണ്ണമയം നീക്കാൻ ഇത് സഹായിക്കും.

കണ്ടീഷണിങ്: കണ്ടീഷണർ തലയോട്ടിയിൽ തേക്കരുത്. മുടിയിഴകളിൽ മാത്രം ഉപയോഗിക്കുക.

വരണ്ട മുടി

ക്യൂട്ടിക്കിൾ കേടുവരുമ്പോഴോ ആവശ്യത്തിന് സെബം ഇല്ലാതിരിക്കുമ്പോഴോ ആണ് മുടി വരണ്ടുപോകുന്നത്. ഇത് മുടി പെട്ടെന്ന് പൊട്ടിപോകാനും താരനും ഉണ്ടാക്കും.

മുടി കഴുകുന്ന രീതി: ആഴ്ചയിൽ ഒന്നോ രണ്ടോ തവണ മാത്രം ഷാംപൂ ചെയ്യുക. സൾഫേറ്റ് ഇല്ലാത്ത ഷാംപൂ തിരഞ്ഞെടുക്കുന്നത് മുടിയിലെ ഈർപ്പം നിലനിർത്താൻ സഹായിക്കും.

കണ്ടീഷണിങ്: നിർബന്ധമായും കണ്ടീഷണർ ഉപയോഗിക്കണം. ആഴ്ചയിലൊരിക്കൽ ഡീപ്പ് കണ്ടീഷണിങ് ചെയ്യുന്നത് മുടിക്ക് തിളക്കം നൽകും. കുളിക്കുന്നതിന് അരമണിക്കൂർ മുമ്പ് ചെറുചൂടുള്ള വെളിച്ചെണ്ണയോ ഒലിവ് ഓയിലോ തേക്കുന്നത് നല്ലതാണ്.

സാധാരണ മുടി

എണ്ണമയവും വരൾച്ചയും കൃത്യമായ അളവിലുള്ള മുടിയാണിത്.

മുടിയുടെ സ്വാഭാവികഘടന നിലനിർത്താൻ മിതമായ ഷാംപൂവും കണ്ടീഷണറും ഉപയോഗിക്കുക.

അമിതമായ കെമിക്കൽ പരീക്ഷണങ്ങളും ഹീറ്റ് സ്റ്റൈലിങ്ങും ഒഴിവാക്കിയാൽ മുടിയുടെ ആരോഗ്യം നിലനിർത്താം.