അറിയാതെ പോകരുത് പച്ച മാങ്ങയുടെ ഈ ആരോഗ്യ ഗുണങ്ങൾ

പച്ചമാങ്ങയിലടങ്ങിയിരിക്കുന്ന 'മാംഗിഫെറിൻ' എന്നറിയപ്പെടുന്ന ആന്‍റി ഓക്സിഡന്‍റ് കൊളസ്ട്രോള്‍ നിയന്ത്രിക്കാൻ സഹായിക്കുന്നു. കൊളസ്ട്രോള്‍ മാത്രമല്ല ട്രൈഗ്ലിസറൈഡ്സ്, ഫാറ്റി ആസിഡ് എന്നിവയെല്ലാം 'ബാലൻസ്' ചെയ്യുന്നു. ഇതിലൂടെ ഹൃദയാരോഗ്യത്തെ സുരക്ഷിതമാക്കുകയും ചെയ്യുന്നു. ഇതിന് പുറമെ പച്ചമാങ്ങയിലുള്ള മഗ്നീഷ്യം, പൊട്ടാസ്യം, എന്നിവയും ഹൃദയാരോഗ്യത്തെ ഉറപ്പിക്കാൻ സഹായിക്കുന്നു. 

ദഹനപ്രശ്നങ്ങള്‍ പരിഹരിക്കുന്നതിനും പച്ചമാങ്ങ ഏറെ സഹായകമാണ്. ഇതിലുള്ള ചില സംയുക്തങ്ങളും ഫൈബറുമാണ് ഇതിന് സഹായകമാകുന്നത്. ഇവ ദഹനരസം കൂടുതലായി ഉത്പാദിപ്പിക്കാൻ സഹായിക്കുന്നു. ഇതിലൂടെയാണ് ദഹനപ്രശ്നങ്ങള്‍ പരിഹരിക്കുന്നത്. മലബന്ധം, അസിഡിറ്റി, നെഞ്ചെരിച്ചില്‍, 'മോണിംഗ് സിക്നെസ്' എന്നീ പ്രശ്നങ്ങള്‍ പരിഹരിക്കുന്നതിനും പച്ചമാങ്ങ സഹായകമാണ്. 

പച്ചമാങ്ങയില്‍ അടങ്ങിയിരിക്കുന്ന 'പോളിഫിനോള്‍സ്' ക്യാൻസര്‍ സാധ്യതയെ വെട്ടിക്കുറക്കുന്നു. അങ്ങനെ ക്യാൻസര്‍ പ്രതിരോധത്തിലും പച്ചമാങ്ങ ഭാഗമാകുന്നുണ്ട്. 

കരളിന്‍റെ ആരോഗ്യം സംരക്ഷിച്ചുനിര്‍ത്തി കരള്‍രോഗങ്ങളെ ചെറുക്കുന്നതിനും പച്ചമാങ്ങ സഹായകമാണ്. നമുക്കറിയാം ശരീരത്തില്‍ നിന്ന് വിഷാംശങ്ങളെ പുറന്തള്ളുന്നതിന് സഹായിക്കുന്നത് കരള്‍ ആണ്. ഈ പ്രക്രിയയെ ത്വരിതപ്പെടുത്തുന്നതിന് പച്ചമാങ്ങയ്ക്ക് സാധിക്കും. പച്ചമാങ്ങയ്ക്ക് പിത്തരസത്തിന്‍റെ ഉത്പാദനം കൂട്ടാനും കൊഴുപ്പ് കൂടുതലായി പിടിച്ചെടുക്കുന്നതിന് സഹായിക്കാനും സാധിക്കും.