ഹെയർ ഡൈ ചെയ്യുന്നവരാണോ നിങ്ങൾ ? എങ്കിൽ സൂക്ഷിക്കണം ..

hair dyer

തലയിൽ ഒരു വെളുത്ത മുടി കണ്ടാൽ മതി, അതുവരെ ഉണ്ടായിരുന്ന സകല സന്തോഷങ്ങളും പെട്ടന്നെങ്ങോ പോയ്മറയും. പിന്നെ ആകെ അസ്വസ്ഥതയാണ്. ഒന്നോ രണ്ടോ ഒക്കെയാണെങ്കിൽ അതങ്ങ് പറിച്ച് കളഞ്ഞ് ആശ്വസിക്കും. എന്നാൽ നര കൂടുന്നു എന്ന് കണ്ടാലോ? മുടിക്ക് നിറം കൊടുക്കുകയാണ് പിന്നെയുള്ള വഴി. മുടി നരക്കുന്നത് പ്രായമാകുന്നതിന്‍റെ ലക്ഷണമായിട്ടാണ് കണക്കാക്കപ്പെടുന്നത്. 

എന്നാൽ ഈ ‘പ്രായം ആകുന്ന’തിന്‍റെ മുമ്പേ തന്നെ മുടി നരച്ച് തുടങ്ങിയാലോ? അപ്പോഴാണ് ആളുകൾ ഹെയർ ഡൈ ഉപയോഗിക്കാൻ ആരംഭിക്കുന്നത്. ഇന്ന് നരച്ച മുടി കറുപ്പിക്കാൻ പല തരത്തിലുള്ള ഹെയർ ഡൈകൾ വിപണിയിൽ ലഭ്യമാണ്. സ്ഥിരമായി ഹെയർ ഡൈ ഉപയോഗിക്കുന്നവരിൽ ക്യാൻസർ സാധ്യത കൂടുതലാണത്രെ. അത്തരത്തിൽ ഉണ്ടാകാൻ സാധ്യതയുള്ള ഒന്നാണ് മൂത്രാശയ ക്യാൻസർ. മുടി ഡൈ ചെയ്യുന്നത് മൂത്രാശയ അർബുദത്തിന് കാരണമാകുന്നത് എങ്ങനെയെന്നും ഇത് തടയാൻ എന്തൊക്കെ കാര്യങ്ങളാണ് സ്വീകരിക്കേണ്ടതെന്നുമെല്ലാം ആണ് ഇനി പറയുന്നത്.

പല ഹെയർ ഡൈ ഉല്പന്നങ്ങളിലും ഉപയോഗിച്ചിട്ടുള്ള രാസപദാർത്ഥങ്ങൾ ക്യാൻസറിന് കാരണമാകുന്നവയാണ്. ഇവയിലെ കാർസിനോജൻ, അരോമാറ്റിക്ക് അമീനുകൾ തുടങ്ങിയവയൊക്കെ ആരോഗ്യത്തെ അപകടാവസ്ഥയിലാക്കിയേക്കാം. അതുകൊണ്ട് തന്നെ ഇത്തരം പദാർത്ഥങ്ങൾ ഹെയർ ഡൈ നിർമ്മാണത്തിന് ഉപയോഗിക്കുന്നത് നിരോധിച്ചിട്ടുണ്ട്. കൂടാതെ ഇത്തരം ഉത്പന്നങ്ങളും അതിലെ ചേരുവകളുമൊക്കെ കർശന പരിശോധനക്ക് ശേഷമാണ് ഇത്തരം ഉത്പന്നങ്ങൾ വിപണിയിൽ എത്തുന്നത്. അതുകൊണ്ട് ക്യാൻസർ ഉണ്ടാകാൻ സാധ്യതയുള്ള പദാർത്ഥങ്ങൾ ആളുകളിലേക്ക് എത്താനുള്ള സാധ്യതയും വളരെ കുറവാണ്.

ഹെയർ ഡൈ ദിവസവും എന്ന രീതിയിൽ കൈകാര്യം ചെയ്യുന്ന ഹെയർ ഡ്രെസ്സെഴ്സ്, ബാർബർ തുടങ്ങിയവരൊക്കെ ഹെയർ ഡൈയിലെ രാസവസ്തുക്കളുമായി നിരന്തരം സമ്പർക്കത്തിൽ വരുന്നവരാണ്. അതുകൊണ്ട് തന്നെ ഇത്തരം ഉത്പന്നങ്ങൾ കൈകാര്യം ചെയ്യുമ്പോൾ ഇവർ ശ്രദ്ധിക്കണം. കാരണം ഇവ പല ആരോഗ്യ പ്രശ്നങ്ങളും ഉണ്ടാക്കിയേക്കാം. ഇത്തരം ഉല്പന്നങ്ങളുമായുള്ള നേരിട്ടുള്ള സമ്പർക്കം ഒഴിവാക്കാനുള്ള പ്രതിരോധ മാർഗ്ഗങ്ങൾ സ്വീകരിക്കുക എന്നതാണ് ചെയ്യാവുന്ന ഒരു കാര്യം. ഹെയർ ഡൈകളിലെ കെമിക്കലുകൾ മാത്രമല്ല രോഗ കാരണമാകുന്നത്. അതുകൊണ്ട് തന്നെ ഹെയർ ഡൈ വ്യവസായശാലകളിലും രാസവസ്തുക്കൾ ഉപയോഗിക്കുന്ന മറ്റ് വ്യവസായ ശാലകളിലുമൊക്കെ ജോലി ചെയ്യുന്നവരാണ് കൂടുതൽ സൂക്ഷിക്കേണ്ടത്. കാരണം ഈ രാസവസ്തുക്കൾ മൂത്രാശയ അർബുദത്തിന് കാരണമായേക്കും. ഇത് കൂടാതെ, പുകവലി, മറ്റ് അണുബാധകൾ എന്നിവയൊക്കെ മൂത്രാശയ ക്യാൻസറിന് കാരണമാകും.

ഹെയർ ഡൈയിൽ അടങ്ങിയിട്ടുള്ള കെമിക്കലുകൾ മാത്രമല്ല, ഹെയർ സ്ട്രെയ്റ്റനിംഗ് ഉത്പന്നങ്ങൾ, സ്മൂത്തനിങ് ഉൽപ്പന്നങ്ങൾ ഇവയിലെ രാസപദാർത്ഥങ്ങളുമായുള്ള അമിത സമ്പർക്കം സ്തനാർബുദം, നോൺ-ഹോഡ്ജകിൻ ലിംഫോമ, ലുക്കീമിയ തുടങ്ങിയ ക്യാൻസർ സാധ്യത വർധിപ്പിച്ചേക്കാം.

എന്തൊക്കെയാണ് മൂത്രാശയ ക്യാൻസറിന്‍റെ ലക്ഷണങ്ങൾ? മൂത്രത്തിൽ രക്തം, മൂത്രമൊഴിക്കുമ്പോൾ അടിവയറ്റിൽ വേദന തുടങ്ങിയ ലക്ഷണങ്ങൾ ഉണ്ടെങ്കിൽ ഉടൻ തന്നെ ഒരു ഡോക്ടറെ കാണേണ്ടതാണ്. കൂടാതെ അടിക്കടി മൂത്രമൊഴിക്കുന്നതും അവഗണിക്കരുത്. ചുരുക്കത്തിൽ, ക്യാൻസറിന് കാരണമാകുന്ന കെമിക്കലുകൾ ഇല്ലാത്ത ഹെയർ ഡൈകളുടെ ഉപയോഗം സുരക്ഷിതമാണ്. എന്നിരുന്നാലും ഇവയുടെ അമിത ഉപയോഗം രോഗങ്ങളിലേയ്ക്ക് നയിച്ചേക്കാം.

Tags