.jpg)
പുട്ടും കടലക്കറിയും !! ആഹാ അന്തസ്സ്
കടലക്കറി
കുക്കറില് ആവശ്യത്തിന് വെള്ളവും കഴുകി വൃത്തിയാക്കി വെച്ചിരിക്കുന്ന കടലയും മഞ്ഞള്പ്പൊടിയും കനം കുറച്ചരിഞ്ഞുവെച്ചിരിക്കുന്ന വലിയ ഉള്ളിയും ചേര്ത്ത് അടുപ്പില് വെക്കുക. മൂന്നുമുതല് നാലു വിസില് അടിക്കുന്നതു വരെ വേവിക്കുക. ( പാചകക്കാരന് വിസിലടിക്കേണ്ടതില്ല. കുക്കറ് സ്വയം അടിച്ചോളും. കുക്കര് വിസില് അടിച്ചില്ലെങ്കില് വേണ്ടപ്പെട്ടവരെയൊക്കെ വിളിച്ചറിയിക്കാന് മറക്കണ്ട.) . അഞ്ച് - ആറുമിനിട്ടുകൊണ്ട് കടല വേവും
.
ഒരു ചീനച്ചട്ടി (അമേരിക്കന് ചട്ടി പറ്റില്ല. വേണമെങ്കില് ഇറാക്ക് ചട്ടിയാവാം) അടുപ്പില് വെച്ച് ആവശ്യത്തിനു എണ്ണ(ആരോഗ്യമുള്ളവര് ഒരു ടീസ്പൂണും ഇല്ലാത്തവര് 2 ടീസ്പൂണും ) ഒഴിക്കുക. എണ്ണ ചൂടായാല് കടുക് പൊട്ടിക്കുക ( മുഖം കാണിച്ചുകൊടുത്താല് അവിടെയും ഒന്ന് പൊട്ടിച്ച് കിട്ടും. ജാഗ്രതൈ..). ചതച്ചുവെച്ചിരിക്കുന്ന വെളുത്തുള്ളിയും പച്ചമുളകും ചേര്ക്കുക. നന്നായി ഇളക്കുക. പിന്നെ കറിവേപ്പില ചേര്ത്തിളക്കുക. വേപ്പില പൊട്ടിത്തെറിച്ചവസാനിച്ചാല് തീകുറച്ച് മുളക് പൊടി ചേര്ക്കുക. മുളക് മൂത്തമണം വരുമ്പോള് (ഒന്നു തുമ്മും) വേവിച്ചുവെച്ചിരിക്കുന്ന കടല ഇതിലേക്ക് പകരുക . ആവശ്യത്തിനു ഉപ്പ് ചേര്ത്ത് മൂടിവെച്ച് അഞ്ചുമിനിട്ട് വേവിക്കുക. കടലക്കറി റെഡി.
