സാധാരണ വെണ്ടയ്ക്ക കറിയിൽ നിന്ന് വ്യത്യസ്തമായ രുചി! നാടൻ സ്റ്റൈൽ വെണ്ടയ്ക്ക മാപ്പാസ്

ചേരുവകൾ
വെണ്ടയ്ക്ക: 1/2 കിലോ (കഴുകി തുടച്ച് ചെറുതായി വട്ടത്തിൽ അരിഞ്ഞത്)
സവാള: 1 എണ്ണം (അരിഞ്ഞത്)
ചെറിയുള്ളി: 4 എണ്ണം (താളിക്കാൻ)
തേങ്ങാപ്പാൽ:
രണ്ടാം പാൽ: 1/2 കപ്പ്
ഒന്നാം പാൽ: 1 1/2 കപ്പ്
പച്ചമുളക്: 6 എണ്ണം (കീറിയത്)
മുളകുപൊടി: 1/2 ടീ സ്പൂൺ
മല്ലിപ്പൊടി: 1 ടേബിൾ സ്പൂൺ
ഗരം മസാലപ്പൊടി: 1/2 ടീ സ്പൂൺ
മഞ്ഞൾപ്പൊടി: 1/4 ടീ സ്പൂൺ
വറ്റൽമുളക്: 2 എണ്ണം
കടുക്: ആവശ്യത്തിന്
കറിവേപ്പില: ആവശ്യത്തിന്
ഉപ്പ്: പാകത്തിന്
വെളിച്ചെണ്ണ / എണ്ണ: വഴറ്റാനും താളിക്കാനും ആവശ്യത്തിന്
തയ്യാറാക്കുന്ന വിധം
വെണ്ടയ്ക്ക വഴറ്റൽ:
ഒരു ചീനച്ചട്ടിയിൽ എണ്ണ ചൂടാക്കി സവാള അരിഞ്ഞത്, മഞ്ഞൾപ്പൊടി, പച്ചമുളക് എന്നിവ ചേർത്ത് നന്നായി വഴറ്റുക.
ഇതിലേക്ക് അരിഞ്ഞു വെച്ചിരിക്കുന്ന വെണ്ടയ്ക്ക ചേർത്ത് വീണ്ടും നന്നായി വഴറ്റുക. ആവശ്യത്തിന് ഉപ്പും ചേർക്കാം.
വെണ്ടയ്ക്കയുടെ വഴുവഴുപ്പ് കുറെയൊക്കെ മാറിവരുമ്പോൾ മുളകുപൊടി, മല്ലിപ്പൊടി, ഗരം മസാലപ്പൊടി എന്നിവ ചേർത്ത് നന്നായി യോജിപ്പിച്ച് ഇളക്കുക.
രണ്ടാം പാൽ ഒഴിച്ച് വേവിക്കൽ:
മസാലകളുടെ പച്ചമണം മാറിക്കഴിഞ്ഞാൽ ഇതിലേക്ക് തേങ്ങയുടെ രണ്ടാം പാൽ ഒഴിക്കുക.
ചട്ടി അടച്ചുവെച്ച് 10-15 മിനിറ്റ് മീഡിയം ഫ്ലെയ്മിൽ വെണ്ടയ്ക്ക വേവിക്കുക.
ഒന്നാം പാൽ ചേർക്കൽ:
കറി നന്നായി തിളച്ചു വെന്ത് കുറുകി വരുമ്പോൾ തീ കുറച്ചു വെച്ച് തേങ്ങയുടെ ഒന്നാം പാൽ ഒഴിക്കുക.
കറി തിളച്ചുപോകാതെ, ചെറുതായി ഒന്ന് ചൂടായി വരുമ്പോൾ തന്നെ അടുപ്പിൽ നിന്നും വാങ്ങി വെക്കുക.
താളിക്കൽ:
ഒരു ചെറിയ പാനിൽ എണ്ണ ചൂടാക്കി കടുക് പൊട്ടിക്കുക.
അതിലേക്ക് അരിഞ്ഞ ചെറിയുള്ളിയും, വറ്റൽമുളകും, കറിവേപ്പിലയും ചേർത്ത് മൂപ്പിച്ച് കറിയിലേക്ക് താളിച്ച് ചേർക്കുക.
അപ്പത്തിനോടും ചോറിനോടുമൊപ്പം കഴിക്കാൻ രുചികരമായ വെണ്ടയ്ക്ക മാപ്പാസ് തയ്യാർ!