.jpg)
ബ്രഡ് ഉപയോഗിച്ച് മധുരത്തിന്റെ മാജിക്
ചേരുവകൾ
ബ്രൗൺ നിറത്തിലുള്ള ബ്രഡ് (സൈഡ് കട്ട് ചെയ്തത്)- 5 സ്ലൈസ്
പഞ്ചസാര -1 കപ്പ്
ഏലക്കായ -4 എണ്ണം
പാൽ (1 കപ്പ് പാൽ തിളപ്പിച്ചു കുറുക്കി എടുത്തത് പാട കളയരുത്) -അരക്കപ്പ്
വെള്ളം -ഒന്നേകാൽ കപ്പ്
റോസ് വാട്ടർ -1 ടേബിൾ സ്പൂൺ
നെയ്യ് -1 ടേബിൾ സ്പൂൺ
ഓയിൽ -ആവശ്യത്തിന്
നാരങ്ങാ നീര് -1 ടേബിൾ സ്പൂൺ
തയ്യാറാക്കുന്ന വിധം
ബ്രഡ് മിക്സിയിൽ ചെറുതായി പൊടിച്ചെടുക്കണം. ഒരു ബൗളിലേക്ക് മാറ്റിയശേഷം നെയ്യ് ചേർത്ത് കുഴയ്ക്കണം. ഇനി 3 ടേബിൾസ്പൂൺ പാൽചേർത്ത് സോഫ്റ്റാകുന്നതുവരെ കുഴയ്ക്കണം. കൈയിൽ ഒട്ടിപ്പിടിക്കരുത്. ഇത് 10 മിനിറ്റ് മാറ്റിവെയ്ക്കണം. ഇനിയൊരു പാനിൽ പഞ്ചസാരയിൽ വെള്ളംചേർത്ത് തിളപ്പിക്കണം. ഒത്തിരി കുറുകാൻ പാടില്ല. ഇനി ഏലക്ക ചതച്ചത്, റോസ് വാട്ടർ എന്നിവ ചേർക്കുക. നാരങ്ങാനീരുകൂടി ചേർത്ത് അടുപ്പിൽനിന്ന് മാറ്റണം. ശേഷം പാനിൽ ഓയിൽ ചൂടാക്കണം. ബ്രെഡ് മിക്സ് ചെറിയ ബോൾസാക്കണം. നല്ല സ്മൂത്ത് ബോൾസാക്കിവേണം എടുക്കാൻ. അല്ലെങ്കിൽ എണ്ണയിൽ വീണാൽ പൊട്ടിപ്പോകും. ബോൾസ്, എണ്ണയിൽ ഗോൾഡൻ ബ്രൗൺ ആകുംവരെ ഫ്രൈ ചെയ്തെടുക്കുക. ഇത് ചൂടോടെ ഷുഗർ സിറപ്പിൽ ചേർക്കണം. ഷുഗർ സിറപ്പ് വളരെ ലോ ഫ്ളേമിൽ വെയ്ക്കുക. രണ്ടു മിനിറ്റ് ചൂടാക്കിയശേഷം അടുപ്പിൽനിന്നും മാറ്റുക. ഇത് ചൂടോടെയോ തണുപ്പിച്ചോ ഉപയോഗിക്കാം.
