ലളിതമായ ചടങ്ങിൽ മാംഗല്യം ; രാജ്‌വേൽ രാജിന് ജീവിതപങ്കാളിയായി നടി പ്രിയ ഭവാനി ശങ്കർ

 തമിഴ്, തെലുങ്ക് സിനിമകളിലൂടെ ശ്രദ്ധേയയായ നടി പ്രിയ ഭവാനി ശങ്കർ വിവാഹിതയായി. വർഷങ്ങളായുള്ള സൗഹൃദവും പ്രണയവും വിവാഹജീവിതത്തിലേക്ക് കടക്കുമ്പോൾ രാജ്‌വേൽ രാജാണ് താരത്തിന്റെ ജീവിതപങ്കാളിയായത്. അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ ലളിതമായ രീതിയിലായിരുന്നു വിവാഹച്ചടങ്ങുകൾ സംഘടിപ്പിച്ചത്. ആഘോഷത്തിന്റെ മനോഹര നിമിഷങ്ങൾ പകർത്തിയ ചിത്രങ്ങളും വീഡിയോകളും പുറത്തുവന്നതോടെ സമൂഹമാധ്യമങ്ങളിൽ ആരാധകശ്രദ്ധ നേടുകയാണ്. താരദമ്പതികൾക്ക് ആശംസകളുമായി നിരവധി പേരാണ് എത്തുന്നത്.

കോളേജ് കാലം മുതൽ പരസ്പരം അറിയാവുന്ന പ്രിയയും രാജ്‌വേലും പത്തുവർഷത്തിലേറെയായി പ്രണയത്തിലായിരുന്നു. വിവാഹ വാർത്തകൾ പുറത്തുവന്നതോടെ സിനിമയിലെ സഹപ്രവർത്തകരും ആരാധകരും അടക്കം നിരവധി പേരാണ് നവവധുവിന് ആശംസകളുമായി രംഗത്തെത്തിയിരിക്കുന്നത്. താരങ്ങളുടെ ഈ ലളിതവും മനോഹരവുമായ വിവാഹരീതി ഇപ്പോൾ ആരാധകർക്കിടയിൽ വലിയ ചർച്ചയായിട്ടുണ്ട്.

വാർത്താ അവതാരകയായി മാധ്യമരംഗത്ത് കരിയർ ആരംഭിച്ച പ്രിയ ഭവാനി ശങ്കർ, പിന്നീട് ടെലിവിഷൻ പരമ്പരകളിലൂടെയാണ് അഭിനയത്തിലേക്ക് ചുവടുവെച്ചത്. തുടർന്ന് ‘മേയാത മാൻ’ എന്ന ചിത്രത്തിലൂടെ തമിഴ് സിനിമയിൽ അരങ്ങേറ്റം കുറിച്ച താരം ചുരുങ്ങിയ കാലംകൊണ്ട് നിരവധി ശ്രദ്ധേയ വേഷങ്ങളുടെ ഭാഗമായി. അടുത്തിടെ റിലീസ് ചെയ്ത തെലുങ്ക് ചിത്രം ‘ഇരുമുടി’യിലെ പ്രകടനം നടിയുടെ കരിയറിൽ വലിയ വഴിത്തിരിവായി മാറിയിരുന്നു. ഏറെ പ്രതീക്ഷയോടെ കാത്തിരിക്കുന്ന ‘ഡിമോണ്ടെ കോളനി 3’ ഉൾപ്പെടെയുള്ള ചിത്രങ്ങളാണ് പ്രിയയുടേതായി ഇനി അണിയറയിൽ ഒരുങ്ങുന്നത്.