അഞ്ച് ദിവസം കൊണ്ട് 150 കോടി ക്ലബ്ബിൽ ഇടം നേടി ‘വിശ്വനാഥ് ആൻഡ് സൺസ്’

തെന്നിന്ത്യൻ താരം സൂര്യ നായകനായി വെങ്കി അറ്റ്‌ലൂരി സംവിധാനം ചെയ്ത ‘വിശ്വനാഥ് ആൻഡ് സൺസ്’ തിയേറ്ററുകളിൽ വൻ വിജയമായി പ്രദർശനം തുടരുകയാണ്. റിലീസ് ചെയ്ത അഞ്ചാം ദിവസം പിന്നിടുമ്പോൾ ആഗോളതലത്തിൽ 150 കോടി രൂപ ഗ്രോസ് കളക്ഷൻ സ്വന്തമാക്കാൻ ചിത്രത്തിന് കഴിഞ്ഞു. മമിത ബൈജു, രാധിക ശരത്കുമാർ, രവീണ ടണ്ടൻ തുടങ്ങിയവരും പ്രധാന വേഷങ്ങളിലെത്തുന്ന ചിത്രം, 2026-ൽ പുറത്തിറങ്ങിയ തമിഴ് സിനിമകളിൽ ഏറ്റവും കൂടുതൽ കളക്ഷൻ നേടിയ ചിത്രങ്ങളിൽ മൂന്നാം സ്ഥാനത്താണ്.

കളക്ഷൻ റിപ്പോർട്ടുകൾ പ്രകാരം, അഞ്ചാം ദിവസമായ ഓഗസ്റ്റ് 18- ന് ഇന്ത്യയിൽ നിന്ന് മാത്രം 6.35 കോടി രൂപ നെറ്റ് കളക്ഷൻ ചിത്രം നേടി. വിദേശത്തുനിന്നുള്ള 2 കോടി രൂപ കൂടി ചേർത്തതോടെ വിദേശത്തെ ആകെ കളക്ഷൻ 45 കോടി രൂപയായി ഉയർന്നു. തമിഴ് പതിപ്പിനെക്കാൾ മികച്ച പ്രതികരണവും തിയേറ്റർ ഒക്യുപ്പൻസിയുമാണ് ചിത്രത്തിന്റെ തെലുങ്ക് പതിപ്പിന് ലഭിക്കുന്നത്. തെലുങ്ക് പതിപ്പ് അഞ്ചാം ദിവസം 3.20 കോടി രൂപ നേടിയപ്പോൾ തമിഴ് പതിപ്പിന് 3.15 കോടി രൂപയാണ് നേടാനായത്.

സംസ്ഥാനങ്ങൾ തിരിച്ചുള്ള കണക്കുകളിൽ ആന്ധ്രാപ്രദേശ്, തെലങ്കാന സംസ്ഥാനങ്ങളിൽ നിന്നാണ് ഏറ്റവും കൂടുതൽ കളക്ഷൻ ലഭിച്ചത് (3.50 കോടി രൂപ). തമിഴ്‌നാട്ടിൽ നിന്ന് 2.35 കോടി രൂപയും, കർണാടകയിൽ നിന്ന് 78 ലക്ഷവും, കേരളത്തിൽ നിന്ന് 55 ലക്ഷവും ചിത്രം നേടി. രാജ്യത്തിന്റെ മറ്റ് ഭാഗങ്ങളിൽ നിന്നുള്ള കളക്ഷൻ കൂടിയായപ്പോൾ അഞ്ചാം ദിവസത്തെ ആകെ ഗ്രോസ് കളക്ഷൻ 7.33 കോടി രൂപയായി.

സിതാര എന്റർടെയ്ൻമെന്റ്‌സിന്റെ ബാനറിൽ സൂര്യദേവര നാഗവംശിയും സായ് സൗജന്യയും ചേർന്ന് നിർമ്മിച്ച ഈ ചിത്രം, വെങ്കി അറ്റ്‌ലൂരിയുടെ ബ്ലോക്ക്ബസ്റ്റർ ചിത്രം ‘ലക്കി ഭാസ്‌കറി’ന് ശേഷമുള്ള മറ്റൊരു വലിയ വിജയമായി മാറിയിരിക്കുകയാണ്. കുടുംബ പ്രേക്ഷകരെയും സൂര്യ ആരാധകരെയും ഒരുപോലെ ആകർഷിക്കുന്ന രീതിയിലാണ് ചിത്രം ഒരുക്കിയിരിക്കുന്നത്.