.jpg)
മൂന്നാം വാരത്തിൽ ഈ ത്രില്ലർ; 'റോന്ത്' ബോക്സ് ഓഫീസിൽ ഇതുവരെ നേടിയത്
ഇലവീഴാ പൂഞ്ചിറയിലൂടെ സംവിധായകനായും അരങ്ങേറ്റം കുറിച്ച ഷാഹി കബീറിൻറെ സംവിധാനത്തിലെത്തിയ ഏറ്റവും പുതിയ ചിത്രമാണ് റോന്ത്. ദിലീഷ് പോത്തനും റോഷൻ മാത്യുവും കേന്ദ്ര കഥാപാത്രങ്ങളെ അവതരിപ്പിച്ച ചിത്രം ജൂൺ 13 നാണ് തിയറ്ററുകളിൽ എത്തിയത്. ഷാഹി കബീറിൻറെ മുൻ ചിത്രങ്ങളെപ്പോലെതന്നെ മികച്ച അഭിപ്രായമാണ് ഈ ചിത്രത്തിനും ലഭിച്ചത്. ഈ അഭിപ്രായങ്ങൾ ചിത്രത്തിൻറെ ബോക്സ് ഓഫീസിൽ പ്രതിഫലിച്ചോ? ഏറ്റവും പുതിയ കണക്കുകൾ എത്രയെന്ന് നോക്കാം.
tRootC1469263">പ്രമുഖ ട്രാക്കർമാരായ സാക്നിൽകിൻറെ കണക്ക് പ്രകാരം ചിത്രം ഇന്ത്യയിൽ നിന്ന് ഇതുവരെ നേടിയ നെറ്റ് കളക്ഷൻ 5.92 കോടിയാണ്. ഗ്രോസ് 6.14 കോടിയും. വിദേശ മാർക്കറ്റുകളിലെ നേട്ടം 2.05 കോടി. അങ്ങനെ ആകെ ആഗോള കളക്ഷൻ 8.19 കോടിയാണ്. മൂന്നാം വാരത്തിലേക്ക് കടന്നപ്പോഴും ചിത്രത്തിന് തിയറ്ററുകളിൽ കാണികൾ ഉണ്ട്.
ഒരു രാത്രി പട്രോളിംഗിന് ഇറങ്ങുന്ന രണ്ട് പോലീസ് ഉദ്യോഗസ്ഥർക്ക് നേരിടേണ്ടിവരുന്ന അനുഭവങ്ങളിലൂടെയാണ് സിനിമ മുന്നോട്ട് പോകുന്നത്. യോഹന്നാൻ എന്ന എസ്ഐ ആയി ദിലീഷ് പോത്തനും ദിനനാഥ് എന്ന ഡ്രൈവറായി റോഷൻ മാത്യുവും ആണ് എത്തുന്നത്. ഇലവീഴാ പൂഞ്ചിറയ്ക്ക് ശേഷം ഷാഹി കബീർ സംവിധാനം ചെയ്ത ഈ ചിത്രം സൂപ്പർ ഹിറ്റായ ഓഫീസർ ഓൺ ഡ്യൂട്ടിക്ക് ശേഷം അദേഹം തിരക്കഥയൊരുക്കുന്ന സിനിമ കൂടിയാണ്. ഫെസ്റ്റിവൽ സിനിമാസിന് വേണ്ടി പ്രമുഖ സംവിധായകൻ രതീഷ് അമ്പാട്ട്, രഞ്ജിത്ത് ഇവിഎം, ജോജോ ജോസ് എന്നിവരും ജംഗ്ലീ പിക്ചേഴ്സിനു വേണ്ടി വിനീത് ജെയിനും ചേർന്നാണ് ചിത്രം നിർമ്മിക്കുന്നത്. അമൃത പാണ്ഡേയാണ് സഹനിർമ്മാതാവ്. ടൈംസ് ഗ്രൂപ്പിന്റെ സബ്സിഡറി കമ്പനിയായ ജംഗ്ലീ പിക്ച്ചേഴ്സ് ആദ്യമായാണ് മലയാളത്തിൽ ഒരു ചിത്രം നിർമ്മിക്കുന്നത്. സുധി കോപ്പ, അരുൺ ചെറുകാവിൽ, ക്രിഷാ കുറുപ്പ്, നന്ദനുണ്ണി, സോഷ്യൽ മീഡിയ താരങ്ങളായ ലക്ഷ്മി മേനോൻ, ബേബി നന്ദുട്ടി തുടങ്ങിയവരും ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.
