റിലീസിന് ഒരുങ്ങി പെപ്പെയുടെ ഈ ചിത്രം

 ക്യൂബ്സ് എൻ്റർടെയ്ൻമെൻറ്സ് അവതരിപ്പിക്കുന്ന ‘കാട്ടാളൻ’ റിലീസിന് ഒരുങ്ങുന്നു. ആൻറണി വർഗീസ് പെപ്പെ നായകനാകുന്ന ഈ ചിത്രം മെയ് മാസത്തിലാണ് തിയേറ്ററുകളിൽ എത്തുക. ചിത്രത്തിന്റെ റിലീസ് പ്രഖ്യാപിച്ചുകൊണ്ടുള്ള പോസ്റ്റർ ഇതിനോടകം തന്നെ സോഷ്യൽ മീഡിയയിൽ വൈറലായിക്കഴിഞ്ഞു. ആനവേട്ടയുടെയും പകയുടെയും പശ്ചാത്തലത്തിൽ ഒരുങ്ങുന്ന ഒരു ഹൈ-വോൾട്ടേജ് ആക്ഷൻ ത്രില്ലറായിരിക്കും ഇതെന്ന സൂചനയാണ് അണിയറപ്രവർത്തകർ നൽകുന്നത്.

പെപ്പെയോടൊപ്പം ആക്ഷൻ രംഗങ്ങളിൽ വിസ്മയിപ്പിക്കാൻ യുവതാരങ്ങളുടെ വൻ നിരതന്നെ ചിത്രത്തിലുണ്ട്. തോക്കുമേന്തി നിൽക്കുന്ന ഹനാൻ ഷാ, ഹിപ്സ്റ്റർ, ആൻസൺ എന്നിവരെ ഉൾപ്പെടുത്തിയുള്ള പുതിയ പോസ്റ്റർ ആരാധകർക്കിടയിൽ വലിയ ചർച്ചയായിട്ടുണ്ട്. ദുഷാര വിജയൻ നായികയായെത്തുന്ന ചിത്രത്തിൽ സുനിൽ, കബീർ സിംഗ് തുടങ്ങിയ പാൻ ഇന്ത്യൻ താരങ്ങളും അണിനിരക്കുന്നു. 140 ദിവസത്തെ നീണ്ട ഷൂട്ടിംഗിന് ശേഷം പുറത്തിറങ്ങിയ ടീസറും ലിറിക്കൽ വീഡിയോയും സിനിമയുടെ വന്യമായ ആഖ്യാനശൈലിയെ വ്യക്തമാക്കുന്നതാണ്.

കെ.ജി.എഫ് ഉൾപ്പെടെയുള്ള ബ്രഹ്മാണ്ഡ ചിത്രങ്ങൾക്ക് സംഗീതം നൽകിയ രവി ബസ്രൂറാണ് കാട്ടാളന്റെ തീം മ്യൂസിക് ഒരുക്കിയിരിക്കുന്നത് എന്നത് സിനിമയുടെ മാറ്റുകൂട്ടുന്നു. കാടിന്റെ വന്യത തുടിക്കുന്ന ബാക്ക്ഗ്രൗണ്ട് സ്കോറുകൾ രവി ബസ്രൂറിൽ നിന്ന് ഒരിക്കൽ കൂടി പ്രേക്ഷകർ പ്രതീക്ഷിക്കുന്നുണ്ട്. കൂടാതെ അജനീഷ് ലോക്നാഥും സംഗീത വിഭാഗത്തിൽ സഹകരിക്കുന്നു. ടി-സീരീസാണ് ചിത്രത്തിന്റെ മ്യൂസിക് റൈറ്റ്സ് സ്വന്തമാക്കിയിരിക്കുന്നത് എന്നതും സിനിമയുടെ വ്യാപ്തി വ്യക്തമാക്കുന്നു.

നവാഗതനായ പോൾ ജോർജ്ജ് സംവിധാനം ചെയ്യുന്ന ഈ ചിത്രം സാങ്കേതിക മികവിലും ഏറെ മുന്നിലായിരിക്കും. ആനയുമായുള്ള സംഘട്ടന രംഗങ്ങൾ വിഎഫ്എക്സ് ഉപയോഗിക്കാതെ യഥാർത്ഥ ആനയെ ഉൾപ്പെടുത്തിയാണ് ചിത്രീകരിച്ചിരിക്കുന്നത് എന്നത് സിനിമാ പ്രേമികളെ ഞെട്ടിച്ച വാർത്തയായിരുന്നു. ഹോംബാലെ ഫിലിംസ് കർണാടക വിതരണാവകാശം റെക്കോർഡ് തുകയ്ക്ക് സ്വന്തമാക്കിയ ‘കാട്ടാളൻ’, മലയാളത്തിലെ മികച്ച ദൃശ്യവിസ്മയങ്ങളിൽ ഒന്നായി മാറുമെന്നാണ് പ്രതീക്ഷിക്കപ്പെടുന്നത്.