അന്ധന്റെ വേഷം ചെയ്യാൻ താൻ ഏറെ ബുദ്ധിമുട്ടി, എന്നാൽ മോഹൻലാലിന്റെ അതിസൂക്ഷ്മമായ പ്രകടനം കണ്ടപ്പോൾ അത്ഭുതപ്പെട്ടുപോയി : സൈഫ് അലി ഖാൻ

  ബോളിവുഡ് ചിത്രം ‘ഭൂത് ബംഗ്ല’യുടെ വൻ വിജയത്തിന് ശേഷം സംവിധായകൻ പ്രിയദർശൻ ഒരുക്കുന്ന പുതിയ ചിത്രമായ ‘ഹൈവാനി’ൽ മലയാളത്തിന്റെ നടനവിസ്മയം മോഹൻലാലും അതിഥി വേഷത്തിലെത്തുന്നു. ചിത്രത്തിൽ കേന്ദ്ര കഥാപാത്രങ്ങളെ അവതരിപ്പിക്കുന്ന അക്ഷയ് കുമാറിനും സൈഫ് അലി ഖാനുമൊപ്പം മോഹൻലാൽ അഭിനയിക്കുന്ന വിവരം സിനിമാപ്രേമികളിൽ വലിയ കൗതുകമാണ് ഉണർത്തിയിരിക്കുന്നത്. മോഹൻലാൽ നായകനായ ‘ഒപ്പം’ എന്ന ചിത്രത്തിൽ നിന്ന് പ്രചോദനം ഉൾക്കൊണ്ട് ഒരുക്കുന്ന ഈ സിനിമയിൽ ഒരു അന്ധന്റെ വേഷം ചെയ്യാൻ താൻ ഏറെ ബുദ്ധിമുട്ടിയെന്നും, എന്നാൽ മോഹൻലാലിന്റെ അതിസൂക്ഷ്മമായ പ്രകടനം കണ്ടപ്പോൾ താൻ അത്ഭുതപ്പെട്ടുപോയെന്നും സൈഫ് അലി ഖാൻ ഒരു അഭിമുഖത്തിൽ തുറന്നുപറഞ്ഞു. ക്യാമറയ്ക്ക് മുന്നിലെത്തുന്ന നിമിഷം കൊണ്ട് കഥാപാത്രമായി മാറുന്ന അദ്ദേഹത്തിന്റെ മാന്ത്രികത നേരിൽ കണ്ട അനുഭവം സൈഫ് അലി ഖാൻ പങ്കുവെക്കുകയുണ്ടായി.

സിനിമയിലെ ഒരു രംഗത്തിൽ കണ്ണട അല്പം താഴ്ത്തിവെച്ച് താൻ ഒരു അന്ധനാണെന്ന് പ്രേക്ഷകർക്ക് മനസ്സിലാക്കിക്കൊടുക്കുന്ന മോഹൻലാലിന്റെ ഒരൊറ്റ ഷോട്ട് അവിശ്വസനീയമായ രീതിയിലാണ് അദ്ദേഹം പൂർത്തിയാക്കിയതെന്ന് സൈഫ് അലി ഖാൻ ഓർമ്മിക്കുന്നു. ക്യാമറയ്ക്ക് പുറത്ത് യാതൊരുവിധ അഹങ്കാരവുമില്ലാത്ത ലളിതനായ മനുഷ്യനാണ് മോഹൻലാലെന്നും, എന്നാൽ ക്യാമറ ഓൺ ആകുമ്പോൾ അദ്ദേഹത്തിന് ചുറ്റും ഒരു പ്രത്യേക പ്രഭാവലയം പ്രകടമാകുമെന്നും സൈഫ് കൂട്ടിച്ചേർത്തു. കന്നഡയിലെ പ്രമുഖ നിർമ്മാണ കമ്പനിയായ കെ.വി.എൻ പ്രൊഡക്ഷൻസ് നിർമ്മിക്കുന്ന ഈ ബിഗ് ബഡ്ജറ്റ് ചിത്രം സെപ്റ്റംബർ 11-നാണ് തിയേറ്ററുകളിൽ എത്തുന്നത്. പ്രിയദർശനും മോഹൻലാലും തമ്മിലുള്ള ആത്മബന്ധത്തിന്റെ ഭംഗി ചിത്രീകരണ വേളയിൽ കാണാൻ കഴിഞ്ഞതും വലിയൊരു അനുഭവമായിരുന്നുവെന്ന് സൈഫ് അലി ഖാൻ വ്യക്തമാക്കി.