ട്രോളുകള്‍ ശരിക്കും ആസ്വദിക്കാറുണ്ട് ; ആരേയും വേദനിപ്പിക്കുന്ന തരത്തിലാവരുത് ട്രോളുകളെന്ന് മഞ്ജുവാര്യര്‍

തെന്നിന്ത്യന്‍ സിനിമാപ്രേക്ഷകരുടെ പ്രിയ താരമാണ് മഞ്ജു വാര്യര്‍. മലയാളത്തിന് പുറമെ തമിഴിലും ഹിന്ദിയിലും താരം സാന്നിധ്യം അറിയിച്ചു. മഞ്ജുവിന്റെ തമിഴ് ചിത്രം തുനിവ് പൊങ്കൽ റിലീസായി പ്രേക്ഷകർക്ക് മുൻപിലെത്തും. 

സിനിമയുടെ പ്രാെമോഷൻ പരിപാടികളിൽ പൊതുവെ സിനിമയെക്കുറിച്ച് മാത്രമാണ് മഞ്ജു സംസാരിക്കാറ്. എന്നാൽ തമിഴ് അഭിമുഖത്തിൽ ചില വ്യക്തിപരമായ കാര്യങ്ങളും മഞ്ജുവിനോട് ചോദിച്ചു.

മദ്യപിച്ച് വാഹനമോടിച്ചിട്ടുണ്ടോയെന്ന് ചോദിച്ചപ്പോള്‍ ഇല്ലെന്നായിരുന്നു മഞ്ജുവിന്റെ മറുപടി. പ്രൊപ്പോസ് ചെയ്യാനാഗ്രഹിക്കുന്ന വ്യക്തിയെക്കുറിച്ച് ചോദിച്ചപ്പോള്‍ അതാരാണെന്ന് പറയാനാവില്ലെന്നായിരുന്നു മറുപടി. യാത്രകള്‍ ഒരുപാടിഷ്ടമാണ്. സോളോ ട്രിപ്പും പ്രിയപ്പെട്ടതാണ്. ഇഷ്ടപ്പെട്ട സ്ഥലങ്ങള്‍ ഒരുപാടുണ്ട്. 

അതേസമയം ട്രോളുകള്‍ താന്‍ ശരിക്കും ആസ്വദിക്കാറുണ്ടെന്നും മഞ്ജു പറഞ്ഞു. അവരുടെ ക്രിയേറ്റിവിറ്റിയെ അഭിനന്ദിക്കേണ്ടത് തന്നെയാണ്. അടുത്ത പ്രാവശ്യവും അതേ അബദ്ധം പറ്റാതിരിക്കാന്‍ നമ്മളെ ഓര്‍മ്മിപ്പിക്കുന്നത് ട്രോളുകളാണ്. ആരേയും വേദനിപ്പിക്കുന്ന തരത്തിലാവരുത് ട്രോളുകള്‍. ഇതാദ്യമായാണ് ആക്ഷന്‍ ഓറിയന്റഡ് സിനിമ ചെയ്യുന്നത്. എന്നെ അഭിനയിക്കാന്‍ വിളിച്ച് ആ റിസ്‌ക്ക് ഏറ്റെടുത്തത് അജിത് സാറാണ്.

ഇഷ്ടപ്പെട്ട നടനെക്കുറിച്ചുള്ള ചോദ്യങ്ങളുമുണ്ടായിരുന്നു. താന്‍ സിനിമയില്‍ത്തന്നെ പ്രവര്‍ത്തിക്കുന്നയാളായതിനാല്‍ ഈ ചോദ്യത്തിന് ഉത്തരം കണ്ടെത്താന്‍ പ്രയാസമാണ്. സിനിമയ്ക്ക് പുറത്ത് നിന്നുള്ളവരോടാണ് ഇതേക്കുറിച്ച് ചോദിക്കേണ്ടത്. 

വളരെയേറെ ബുദ്ധിമുട്ടുള്ള ചോദ്യമാണിത്. സിനിമയിലെ ഓരോരുത്തരുടേയും ഗുണങ്ങള്‍ അറിയാം. അതിനാല്‍ ഒരാളെ തിരഞ്ഞെടുക്കാനും ബുദ്ധിമുട്ടാണ്, ഇത് ഞാന്‍ ഡിപ്ലോമാറ്റിക്കായി പറയുന്നതല്ലെന്നുമായിരുന്നു മഞ്ജു പറഞ്ഞത്.