ജോജു ജോർജ് ചിത്രം ‘വരവ്’ തിയേറ്ററുകളിലേക്ക് !

 ഷാജി കൈലാസ്-ജോജു ജോർജ് കൂട്ടുകെട്ടിൽ പുറത്തിറങ്ങുന്ന ‘വരവ്’ എന്ന ചിത്രം പ്രഖ്യാപന സമയം മുതൽക്കേ സിനിമാപ്രേമികൾക്കിടയിൽ വലിയ തരംഗമാണ് സൃഷ്ടിക്കുന്നത്. ഷാജി കൈലാസ് എന്ന ആക്ഷൻ മാസ്റ്ററും അഭിനയ പ്രതിഭ ജോജു ജോർജും ആദ്യമായി ഒന്നിക്കുന്നു എന്ന പ്രത്യേകതയുള്ള ഈ ചിത്രത്തെക്കുറിച്ച് നടൻ ജോജു തന്നെ വലിയ പ്രതീക്ഷകൾ പങ്കുവെച്ചു കഴിഞ്ഞു. ഒരു ‘ഗെയിം ഓഫ് സർവൈവൽ’ എന്ന് വിശേഷിപ്പിക്കപ്പെടുന്ന സിനിമ, മലയോര മേഖലയിലെ പ്ലാന്റർമാർക്കിടയിലുള്ള കുടിപ്പകയുടെയും അതിജീവനത്തിന്റെയും കഥയാണ് പറയുന്നത്. ഷാജി കൈലാസിന്റെ മുൻകാല ഹിറ്റുകളായ ചിന്താമണി കൊലക്കേസ്, റെഡ് ചില്ലീസ് എന്നിവയ്ക്ക് തൂലിക ചലിപ്പിച്ച എ.കെ. സാജൻ തന്നെയാണ് ഈ ചിത്രത്തിന്റെ തിരക്കഥ ഒരുക്കുന്നത് എന്നതും പ്രതീക്ഷകൾക്ക് ആക്കം കൂട്ടുന്നു.

നൈസി റെജിയുടെ നിർമ്മാണത്തിൽ ഒരുങ്ങുന്ന ഈ ചിത്രം വമ്പൻ താരനിരയാൽ സമൃദ്ധമാണ്. ജോജുവിനൊപ്പം നീണ്ട ഇടവേളയ്ക്ക് ശേഷം ആക്ഷൻ റാണി വാണി വിശ്വനാഥ് മടങ്ങിയെത്തുന്നു എന്നതിനൊപ്പം മുരളി ഗോപി, അർജുൻ അശോകൻ, ബാബുരാജ്, സുകന്യ തുടങ്ങി മലയാളത്തിലെ പ്രമുഖ താരങ്ങളും ചിത്രത്തിൽ പ്രധാന വേഷങ്ങളിൽ അണിനിരക്കുന്നുണ്ട്. പ്ലാന്റേഷൻ പശ്ചാത്തലത്തിലുള്ള തീക്ഷ്ണമായ ആക്ഷൻ ഡ്രാമയായിരിക്കും ഇതെന്ന സൂചനകളാണ് പുറത്തുവരുന്നത്. പ്രേക്ഷകർ ആകാംക്ഷയോടെ കാത്തിരിക്കുന്ന ‘വരവ്’ വരാനിരിക്കുന്ന മെയ് മാസത്തിൽ തിയേറ്ററുകളിലേക്ക് എത്താൻ തയ്യാറെടുക്കുകയാണ്.