ആവേശം വിതറി ‘ജന നായകൻ’

 തമിഴ് താരം വിജയ് നായകനായി തിയേറ്ററുകളിലെത്തിയ അവസാന ചിത്രം ‘ജന നായകൻ’ മൂന്നാം വാരത്തിലും ബോക്സ് ഓഫീസിൽ മികച്ച പ്രകടനം തുടരുന്നു. വലിയ പ്രതീക്ഷകളോടെയാണ് ആരാധകർ ഈ ചിത്രത്തെ വരവേറ്റത്. പൊങ്കൽ റിലീസായി എത്തേണ്ടിയിരുന്ന ചിത്രം സെൻസർ പ്രശ്നങ്ങൾ കാരണം നീണ്ടുപോവുകയും, ഒടുവിൽ ജൂലൈ 23-നാണ് തിയേറ്ററുകളിലെത്തിയത്. റിലീസിന് ശേഷം സമ്മിശ്ര പ്രതികരണങ്ങളാണ് ഉയർന്നതെങ്കിലും, അതൊന്നും തിയേറ്ററുകളിലെ ജനത്തിരക്കിനെയും കളക്ഷനെയും ബാധിച്ചില്ലെന്ന് കണക്കുകൾ സൂചിപ്പിക്കുന്നു.

പ്രമുഖ ട്രേഡ് അനലിസ്റ്റുകളായ സാക്നിൽകിന്റെ കണക്കുകൾ പ്രകാരം ചിത്രം ഇതുവരെ ആഗോളതലത്തിൽ 318.09 കോടി രൂപയാണ് വാരിയത്. റിലീസിന് ശേഷമുള്ള മൂന്നാമത്തെ തിങ്കളാഴ്ച മാത്രം ഇന്ത്യയിൽ നിന്ന് 75 ലക്ഷം രൂപ നെറ്റ് കളക്ഷൻ നേടി. 1976 ഷോകളിൽ നിന്നായി 14.2 ശതമാനം ഒക്യുപ്പൻസിയാണ് ഓഗസ്റ്റ് 10ന് രേഖപ്പെടുത്തിയത്. ഇതുകൂടാതെ, ഇന്ത്യയിൽ നിന്ന് മാത്രം ഇതുവരെ 224.89 കോടി രൂപ ഗ്രോസ് കളക്ഷനും (193.05 കോടി നെറ്റ്), വിദേശ മാർക്കറ്റുകളിൽ നിന്ന് 93.20 കോടി രൂപ ഗ്രോസ് കളക്ഷനും ചിത്രം സ്വന്തമാക്കിയിട്ടുണ്ട്.

എച്ച്. വിനോദ് തിരക്കഥയെഴുതി സംവിധാനം ചെയ്ത ഈ ചിത്രം തെലുങ്ക് ഹിറ്റ് ചിത്രം ‘ഭഗവന്ത് കേസരി’യിൽ നിന്ന് പ്രചോദനം ഉൾക്കൊണ്ടാണ് ഒരുക്കിയിരിക്കുന്നത്. പൂജ ഹെഗ്ഡെ, ബോബി ഡിയോൾ, പ്രകാശ് രാജ്, ഗൗതം വസുദേവ് മേനോൻ, പ്രിയാമണി, മമിത ബൈജു, നരെയ്ൻ തുടങ്ങിയ വമ്പൻ താരനിരയാണ് ചിത്രത്തിൽ അണിനിരക്കുന്നത്.