കേരളത്തിൽ റെക്കോർഡ് ഷോകളുമായി ‘ജയിലർ 2’ കുതിക്കുന്നു

 സൂപ്പർസ്റ്റാർ രജനികാന്തിനെ നായകനാക്കി നെൽസൺ ദിലീപ്കുമാർ സംവിധാനം ചെയ്ത ‘ജയിലർ 2’ ഒക്ടോബർ 15-ന് തിയേറ്ററുകളിലെത്തി. കേരളത്തിൽ 800-ഓളം സ്ക്രീനുകളിൽ റെക്കോർഡ് റിലീസായെത്തിയ ചിത്രം ആദ്യദിനം മാത്രം 4000-ത്തോളം ഷോകളാണ് പൂർത്തിയാക്കിയത്. സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിച്ച ചിത്രം കേരളത്തിൽ തിയേറ്ററുകളിലെത്തിച്ചത് ശ്രീ ഗോകുലം മൂവീസിന്റെ ബാനറിൽ ശ്രീ ഗോകുലം ഗോപാലനാണ്. റിലീസ് ചെയ്ത് ദിവസങ്ങൾക്കുള്ളിൽ തന്നെ ആഗോള ബോക്സ് ഓഫീസിൽ ചിത്രം 211 കോടി രൂപ നേടിയതായി സാക്നിൽക് റിപ്പോർട്ട് ചെയ്യുന്നു.

മലയാളത്തിന്റെ മെഗാതാരം മോഹൻലാൽ വീണ്ടും മാത്യു എന്ന കഥാപാത്രമായി എത്തിയതാണ് കേരളത്തിൽ ചിത്രത്തിന് ലഭിച്ച വൻ വരവേൽപ്പിന് പ്രധാന കാരണം. ആദ്യ ഭാഗത്തിലെ അതിഥി വേഷത്തിലൂടെ പ്രേക്ഷകരെ ആവേശത്തിലാക്കിയ മോഹൻലാലിന്റെ സാന്നിധ്യം രണ്ടാം ഭാഗത്തിലും മാറ്റുകൂട്ടി. രജനികാന്തും മോഹൻലാലും ബിഗ് സ്ക്രീനിൽ ഒന്നിച്ചെത്തിയത് തിയേറ്ററുകളിൽ വലിയ ആഘോഷ അന്തരീക്ഷമാണ് സൃഷ്ടിച്ചത്. ചിത്രത്തിലെ മറ്റ് അതിഥി താരങ്ങളുടെ പ്രകടനത്തിനും മികച്ച തിയേറ്റർ പ്രതികരണങ്ങളാണ് ലഭിക്കുന്നത്.

വൻ വിജയമായ ആദ്യ ഭാഗത്തിന് ശേഷം ‘മുത്തുവേൽ പാണ്ഡ്യൻ’ ആയി രജനികാന്ത് തിരികെയെത്തുമ്പോൾ കന്നഡ സൂപ്പർ താരം ശിവ രാജ്കുമാറും ചിത്രത്തിൽ ശക്തമായ സാന്നിധ്യമായി ഒപ്പമുണ്ട്. ഇതിന് പുറമെ സുരാജ് വെഞ്ഞാറമൂട്, എസ്.ജെ. സൂര്യ, വിദ്യ ബാലൻ, മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ തുടങ്ങിയ വമ്പൻ താരനിര തന്നെ ചിത്രത്തിൽ അണിനിരക്കുന്നുണ്ട്.

വിജയ് കാർത്തിക് കണ്ണൻ ഛായാഗ്രഹണം നിർവ്വഹിച്ചിരിക്കുന്ന ചിത്രത്തിന്റെ എഡിറ്റിംഗ് ആർ. നിർമ്മലും സംഗീത സംവിധാനം അനിരുദ്ധ് രവിചന്ദറുമാണ് കൈകാര്യം ചെയ്തിരിക്കുന്നത്. സൂപ്പർ ഹിറ്റ് കൂട്ടുകെട്ടുകൾ വീണ്ടും ഒന്നിച്ച ഈ ആക്ഷൻ എന്റർടെയ്നർ തിയേറ്ററുകളിൽ വലിയ തരംഗമായി മുന്നേറുകയാണ്.