റെക്കോ‍ഡ് കടപുഴക്കി ഗുഡ് ബാഡ് അഗ്ലി: ബോക്സ് ഓഫീസിൽ കൊടുങ്കാറ്റ്!

അജിത് കുമാറിന്റെ ഗുഡ് ബാഡ് അഗ്ലി വളരെ പ്രതീക്ഷയോടെയാണ് തിയേറ്ററുകളിൽ എത്തിയത്. ഈ വർഷം ആദ്യം പുറത്തിറങ്ങിയ വിഡാമുയർച്ചിയുടെ വീഴ്ചയ്ക്ക് ശേഷം അജിത്തിന്റെ ബോക്സ് ഓഫീസിലെ വിജയകരമായ തിരിച്ചുവരവാണ് ഈ കളർഫുൾ മാസ് എൻറർടെയ്നർ ഒരുക്കുന്നത് എന്നാണ് ബോക്സോഫീസ് കണക്കുകൾ പറയുന്നത്. 

ട്രാക്കിംഗ് സൈറ്റായ സാക്നിൽ.കോം കണക്കനുസരിച്ച് വ്യാഴാഴ്ച ചിത്രം ആഭ്യന്തരമായി  28.50 കോടി രൂപ നെറ്റ് കളക്ഷൻ നേടിയിട്ടുണ്ട്. തിയേറ്ററുകളിൽ മികച്ച ഒക്യുപെൻസി നിർത്തിയ ചിത്രം ദിവസം മുഴുവൻ ശരാശരി 76% എന്ന നിലയിൽ ഇത് നിലനിർത്തി. 

ചെന്നൈ, കോയമ്പത്തൂർ തുടങ്ങിയ തമിഴ്‌നാട്ടിലെ ചില ഭാഗങ്ങളിൽ വൈകുന്നേര ഷോകൾക്ക് 95% ത്തിലധികം പ്രേക്ഷക ഒക്യുപെൻസി രേഖപ്പെടുത്തി. ഫസ്റ്റ്ഡേ കിംഗ് എന്ന് ബോക്സോഫീസിൽ വിളിപ്പേരുള്ള അജിത്തിൻറെ ഈ ആഘോഷപടം അത് തീർത്തും ശരിയാണ് എന്നാണ് തെളിയിക്കുന്നത്. വാരാന്ത്യത്തിൽ കളക്ഷൻ വർദ്ധിക്കാനാണ് സാധ്യത. 

ഇതോടെ റിലീസ് ദിനത്തിൽ ഏറ്റവും കൂടുതൽ ആഭ്യന്തര കളക്ഷൻ നേടിയ അജിത് ചിത്രമായി ഗുഡ് ബാഡ് അഗ്ലി മാറി. 2022 ൽ ആദ്യ ദിനത്തിൽ 28 കോടി ആഭ്യന്തര കളക്ഷൻ നേടിയ വലിമെയുടെ കളക്ഷൻ റെക്കോർഡ് മറികടന്നിരിക്കുകയാണ് ചിത്രം. 

ഈ വർഷം ആദ്യം പുറത്തിറങ്ങിയ അജിത്തിന്റെ വിഡാമുയർച്ചി ആദ്യ ദിനത്തിൽ 22 കോടി കളക്ഷൻ നേടിയിരുന്നു. ഇന്ത്യയ്ക്ക് പുറത്ത് അജിത്തിന്റെ ജനപ്രീതി കണക്കിലെടുക്കുമ്പോൾ, വിദേശത്തും ഗുഡ് ബാഡ് അഗ്ലി ഒന്നാം ദിനം വൻ കളക്ഷൻ നേടും എന്നാണ് കരുതുന്നത്. വെള്ളിയാഴ്ച ഉച്ചകഴിഞ്ഞ് അന്തിമ കണക്കുകൾ വരുമ്പോൾ തമിഴ് സിനിമയിലെ മികച്ച ഓപ്പണിംഗുകളിൽ ഒന്നാകും ആദിക് രവിചന്ദ്രൻ സംവിധാനം ചെയ്ത  ഗുഡ് ബാഡ് അഗ്ലി  എന്നാണ് സൂചന വരുന്നത്.