ആഗോള കളക്ഷനിൽ 160 കോടി കടന്ന് ‘കറുപ്പ്’

 സൂര്യയെ നായകനാക്കി ആർ. ജെ. ബാലാജി സംവിധാനം ചെയ്ത ഏറ്റവും പുതിയ മാസ് കൊമേഴ്‌സ്യൽ എന്റർടൈനർ ചിത്രം ‘കറുപ്പ്’ ബോക്സ് ഓഫീസിൽ തരംഗം സൃഷ്ടിക്കുകയാണ്. സമീപകാല ചിത്രങ്ങളുടെ പരാജയങ്ങൾക്ക് ശേഷം സൂര്യയ്ക്ക് വലിയൊരു ആശ്വാസമായി മാറിയിരിക്കുകയാണ് ഈ ചിത്രത്തിന്റെ വമ്പൻ വിജയം. റിലീസ് ചെയ്ത് ചുരുങ്ങിയ ദിവസങ്ങൾക്കുള്ളിൽ തന്നെ ആഗോള ബോക്സ് ഓഫീസിൽ 161.04 കോടി രൂപ നേടാൻ ചിത്രത്തിന് സാധിച്ചു. ഇന്ത്യൻ ബോക്സ് ഓഫീസിൽ നിന്ന് മാത്രം 110.04 കോടി രൂപ ഗ്രോസ് കളക്ഷൻ നേടിയ സിനിമ തമിഴ്‌നാട്ടിൽ നിന്ന് മാത്രമായി 80 കോടി രൂപയാണ് വാരികൂട്ടിയത്. വിദേശ വിപണിയിൽ നിന്നും 51 കോടിയോളം രൂപ ചിത്രം സ്വന്തമാക്കിയിട്ടുണ്ട്. ഔദ്യോഗിക സ്ഥിരീകരണങ്ങൾ വന്നിട്ടില്ലെങ്കിലും ചിത്രത്തിന്റെ ഒടിടി റൈറ്റ്‌സ് നെറ്റ്ഫ്ലിക്സും സാറ്റലൈറ്റ് റൈറ്റ്‌സ് സീ തമിഴും ഇതിനോടകം സ്വന്തമാക്കിയതായാണ് ട്രേഡ് അനലിസ്റ്റുകളുടെ റിപ്പോർട്ടുകൾ സൂചിപ്പിക്കുന്നത്.

ഏകദേശം രണ്ട് പതിറ്റാണ്ടുകൾക്ക് ശേഷം സൂര്യയും തൃഷയും വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. മുൻ ചിത്രങ്ങളിൽ നിന്നും തികച്ചും വ്യത്യസ്തമായ വേറിട്ട മേക്കോവറിലാണ് ഇരുവരും കറുപ്പിൽ പ്രത്യക്ഷപ്പെടുന്നത്. യുവ സംഗീത പ്രതിഭ സായ് അഭ്യാങ്കർ ഈ ചിത്രത്തിനായി ഈണങ്ങൾ ഒരുക്കിയപ്പോൾ പ്രശസ്ത ഛായാഗ്രാഹകൻ ജി. കെ. വിഷ്ണുവാണ് ദൃശ്യങ്ങൾ പകർത്തിയത്. ആർ. കലൈവാനൻ എഡിറ്റിംഗും അരുൺ വെഞ്ഞാറമൂട് ഗംഭീരമായ സെറ്റുകളും നിർവ്വഹിച്ചിരിക്കുന്നു. രാജ്യത്തുടനീളം ശ്രദ്ധേയരായ അൻബറിവ്, വിക്രം മോർ എന്നിവർ ഒരുക്കിയ ആക്ഷൻ രംഗങ്ങൾ ചിത്രത്തിന്റെ വലിയ ആകർഷണമാണ്. ഇന്ദ്രൻസ്, നാട്ടി, സ്വാസിക, അനഘ മായ രവി, ശിവദ, സുപ്രീത് റെഡ്ഡി തുടങ്ങിയ വൻ താരനിര അണിനിരന്ന ഈ ചിത്രം നിർമ്മിച്ചിരിക്കുന്നത് ഡ്രീം വാരിയർ പിക്ചേഴ്സ് ആണ്.