‘എഫ് 6 ബിൽഡിംഗ് ഐവറി സ്ട്രീറ്റ്’ ചിത്രത്തിന്റെ ഫസ്റ്റ് ലുക്ക് പോസ്റ്റർ ശ്രദ്ധ നേടുന്നു

 മലയാളത്തിലും തമിഴിലുമായി ഒരുങ്ങുന്ന പുതിയ ഹൊറർ ത്രില്ലർ ചിത്രമാണ് ‘എഫ് 6 ബിൽഡിംഗ് ഐവറി സ്ട്രീറ്റും’ ഇതിന്റെ ഫസ്റ്റ് ലുക്ക് പോസ്റ്ററും ഇതിനോടകം തന്നെ സിനിമാപ്രേമികൾക്കിടയിൽ വലിയ ചർച്ചയായിട്ടുണ്ട്. നവാഗതനായ അഭയ് ശങ്കർ കഥയും തിരക്കഥയും സംഭാഷണവും രചിച്ച് സംവിധാനം ചെയ്യുന്ന ഈ ചിത്രം ഓറാ ടെയ്ൽ സ്റ്റുഡിയോസിന്റെ ബാനറിലാണ് നിർമ്മിക്കുന്നത്. കേവലം പേടിപ്പെടുത്തുന്ന മുഹൂർത്തങ്ങൾക്കപ്പുറം കുടുംബ ബന്ധങ്ങൾക്കും പ്രണയത്തിനും കോമഡിയ്ക്കും തുല്യ പ്രാധാന്യം നൽകിക്കൊണ്ടുള്ള വ്യത്യസ്തമായ ഒരു ദൃശ്യാനുഭവമാണ് ചിത്രം വാഗ്ദാനം ചെയ്യുന്നത്. ഒരു പുതുമുഖ സംവിധായകന്റെ കയ്യിൽ ഭദ്രമായെത്തുന്ന ഈ പ്രമേയം പ്രേക്ഷകരിൽ വലിയ പ്രതീക്ഷകളാണ് ജനിപ്പിച്ചിരിക്കുന്നത്.

കേരളത്തിൽ നിന്നും പുതിയൊരു ജീവിതം കെട്ടിപ്പടുക്കാനായി അമ്മയോടൊപ്പം ചെന്നൈയിലേക്ക് താമസം മാറുന്ന ഒരു സിനിമാമോഹിയുടെ ജീവിതത്തിലൂടെയാണ് ചിത്രത്തിന്റെ കഥ പുരോഗമിക്കുന്നത്. എന്നാൽ പുതിയ വീട്ടിലെത്തിയ ഇവർക്ക് അവിടെ നിന്നും നേരിടേണ്ടി വരുന്ന അമാനുഷികവും ദുരൂഹവുമായ സംഭവങ്ങൾ അവരുടെ ജീവിതത്തെ അപ്രതീക്ഷിതമായ ഭീതിയുടെ നിഴലിലാഴ്ത്തുന്നു. ഈ വീടിന്റെ ഉള്ളറകളിൽ ഒളിഞ്ഞിരിക്കുന്ന നിഗൂഢതകളും ഭയാനകമായ മുഹൂർത്തങ്ങളുമാണ് ചിത്രത്തിന്റെ പ്രധാന ആകർഷണം. ഇരുണ്ട പശ്ചാത്തലത്തിൽ അമ്മയും മകനും അമ്പരപ്പോടെയും ഭയത്തോടെയും നിൽക്കുന്ന രീതിയിൽ പുറത്തിറങ്ങിയ ഫസ്റ്റ് ലുക്ക് പോസ്റ്റർ ചിത്രത്തിന്റെ ഈ മിസ്റ്ററി സ്വഭാവം വളരെ വ്യക്തമായി പ്രേക്ഷകരിലേക്ക് എത്തിക്കുന്നുണ്ട്.

ചിത്രത്തിൽ കലേഷ് രാമാനന്ദൻ നായകനായി എത്തുമ്പോൾ ശ്രദ്ധ ഗോകുൽ നായികയായി അരങ്ങേറ്റം കുറിക്കുന്നു. ഒപ്പം മലയാളികളുടെ പ്രിയപ്പെട്ട കലാരഞ്ജിനി നായകന്റെ അമ്മയായി ശക്തമായൊരു കഥാപാത്രത്തെ അവതരിപ്പിക്കുന്നുണ്ട്. രമേഷ് തിലക്, തലൈവാസൽ വിജയ്, വർഷങ്ങൾക്ക് ശേഷം വെള്ളിത്തിരയിലേക്ക് തിരിച്ചെത്തുന്ന ചാർമിള തുടങ്ങി നിരവധി പ്രമുഖ താരങ്ങളും ചിത്രത്തിൽ അണിനിരക്കുന്നുണ്ട്. പ്രശസ്ത സംഗീത സംവിധായകൻ ശ്രീജിത്ത് ഇടവന സംഗീതവും പശ്ചാത്തലസംഗീതവും ഒരുക്കുന്ന ചിത്രത്തിന്റെ ഛായാഗ്രഹണം പ്രശാന്ത് പ്രണവും എഡിറ്റിംഗ് എം എസ് അയ്യപ്പൻ നായരുമാണ് നിർവ്വഹിക്കുന്നത്.