.jpg)
ധനുഷിന്റെ പുതിയ സിനിമയുടെ സെറ്റിൽ വൻ തീപിടിത്തം; സെറ്റ് പൂർണമായും കത്തിനശിച്ചു
ധനുഷ് സംവിധാനം ചെയ്യുന്ന പുതിയ സിനിമയുടെ സെറ്റിൽ തീപിടിത്തം. ധനുഷ് സംവിധാനവും സഹനിർമാണവും നിർവഹിക്കുന്ന ‘ഇഡ്ലി കടൈ’ എന്ന സിനിമയുടെ സെറ്റിലാണ് തീപിടിത്തമുണ്ടായത്. തമിഴ്നാട്ടിലെ തേനി ആണ്ടിപ്പെട്ടി ഗ്രാമത്തിലാണ് സംഭവം.
ആണ്ടിപ്പെട്ടിയിലെ ഷെഡ്യൂൾ പൂർത്തിയാക്കി മടങ്ങാൻ ഒരുങ്ങുന്നതിനിടെയാണ് അപകടമുണ്ടായത്. തീപിടിക്കാനുള്ള കാരണം വ്യക്തമല്ല. സെറ്റ് പൂർണമായും കത്തിനശിച്ചിട്ടുണ്ട്. ഫയർഫോഴ്സ് എത്തിയാണ് തീ നിയന്ത്രണവിധേയമാക്കിയത്. തീപിടിത്തത്തിന്റെ ദൃശ്യങ്ങൾ പുറത്തുവന്നു.ആർക്കും പരിക്കേറ്റിട്ടില്ലെന്നാണ് വിവരം.
ചെറിയ തീപിടിത്തം ശക്തമായ കാറ്റിൽ സെറ്റാകെ പടർന്നുപിടിക്കുകയായിരുന്നു. തേനിയിലെ തന്നെ മറ്റൊരു സ്ഥലത്തേക്ക് ഷൂട്ട് ആരംഭിച്ചെങ്കിലും ആണ്ടിപ്പെട്ടിയിൽ നിർമിച്ച സെറ്റ് അണിയറപ്രവർത്തകർ പൊളിച്ചുമാറ്റിയിരുന്നില്ല. അപകടസമയത്ത് സ്ഥലത്ത് ആരും ഉണ്ടായിരുന്നില്ല.
ധനുഷ് സംവിധാനം ചെയ്യുന്ന നാലാമത്തെ ചിത്രമാണ് ഇഡ്ലി കടൈ. ധനുഷാണ് ചിത്രത്തിലെ നായകൻ. നിത്യ മേനോൻ, സത്യരാജ്, അരുൺ വിജയ് എന്നിവർ ചിത്രത്തിൽ പ്രധാനവേഷങ്ങൾ ചെയ്യുന്നു. ഒക്ടോബറിലാണ് ഇഡ്ലി കടൈ തിയേറ്ററുകളിലെത്തുന്നത്.
