മമ്മൂട്ടിയുടെ പത്മഭൂഷൺ പുരസ്കാര നേട്ടം കേക്ക് മുറിച്ച് ആഘോഷമാക്കി ധനുഷും കൂട്ടരും !

 മെഗാസ്റ്റാർ മമ്മൂട്ടിയുടെ പത്മഭൂഷൺ പുരസ്കാര നേട്ടം കേക്ക് മുറിച്ച് ആഘോഷമാക്കി സൂപ്പർതാരം ധനുഷും സംവിധായകൻ രാജ്‌കുമാർ പെരിയസാമിയും ഉൾപ്പെടുന്ന ‘ഓം’ സിനിമയുടെ അണിയറപ്രവർത്തകർ. ധനുഷിനെ നായകനാക്കി ‘അമരൻ’ എന്ന മെഗാ ഹിറ്റ് ചിത്രത്തിന് ശേഷം രാജ്‌കുമാർ പെരിയസാമി ഒരുക്കുന്ന ഈ പാൻ-ഇന്ത്യൻ ചിത്രത്തിൽ മമ്മൂട്ടി അതീവ നിർണ്ണായകമായ ഒരു കഥാപാത്രത്തെയാണ് അവതരിപ്പിക്കുന്നത്. മമ്മൂട്ടിയുടെ പത്മഭൂഷൺ നേട്ടത്തോടുള്ള ആദരസൂചകമായി ചിത്രത്തിലെ അദ്ദേഹത്തിന്റെ ദുരൂഹത നിറഞ്ഞ ഒരു ക്യാരക്ടർ പോസ്റ്ററും അണിയറപ്രവർത്തകർ പുറത്തുവിട്ടിട്ടുണ്ട്. കണ്ണുകൾ മാത്രം വ്യക്തമാകുന്ന രീതിയിലുള്ള ഈ പോസ്റ്റർ ഇതിനകം തന്നെ സോഷ്യൽ മീഡിയയിൽ ആരാധകർ ഏറ്റെടുത്തു കഴിഞ്ഞു. ധനുഷിന്റെ വണ്ടർബാർ ഫിലിംസും ആർ ടേക്ക് സ്റ്റുഡിയോസും ചേർന്നാണ് ഈ ബിഗ് ബജറ്റ് ചിത്രം നിർമ്മിക്കുന്നത്.

ഏകദേശം എട്ട് വർഷത്തെ നീണ്ട ഇടവേളയ്ക്ക് ശേഷമാണ് മമ്മൂട്ടി ഒരു തമിഴ് ചിത്രത്തിൽ അഭിനയിക്കുന്നത് എന്ന പ്രത്യേകതയും ‘ഓം’ എന്ന സിനിമയ്ക്കുണ്ട്. 2018-ൽ റാം സംവിധാനം ചെയ്ത ‘പേരൻപ്’ എന്ന ചിത്രത്തിലായിരുന്നു മമ്മൂട്ടി അവസാനമായി തമിഴിൽ വേഷമിട്ടത്. അതിലെ വൈകാരികമായ പ്രകടനം അന്താരാഷ്ട്ര തലത്തിൽ വരെ വലിയ പ്രശംസ നേടിയിരുന്നു. തമിഴകത്ത് ഒട്ടനവധി സൂപ്പർഹിറ്റുകൾ സമ്മാനിച്ചിട്ടുള്ള മമ്മൂക്ക വീണ്ടും തമിഴിലേക്ക് തിരിച്ചെത്തുമ്പോൾ സിനിമാ ലോകത്ത് വലിയ രീതിയിലുള്ള ആവേശമാണ് ഉയരുന്നത്. വരാനിരിക്കുന്ന ചിത്രത്തിൽ തികച്ചും വ്യത്യസ്തവും ശക്തവുമായ ഏത് ഭാവത്തിലാണ് താരം എത്തുക എന്നറിയാനുള്ള ആകാംക്ഷയിലാണ് സിനിമ പ്രേമികൾ.

മമ്മൂട്ടിയും ധനുഷും കൂടാതെ തെന്നിന്ത്യയിലെ വമ്പൻ താരനിരയാണ് ഈ ചിത്രത്തിനായി അണിനിരക്കുന്നത്. തെന്നിന്ത്യൻ പ്രിയങ്കരി സായ് പല്ലവിയും ശ്രീലീലയുമാണ് ചിത്രത്തിലെ പ്രധാന സ്ത്രീ കഥാപാത്രങ്ങൾക്ക് ജീവൻ നൽകുന്നത്. ‘മാരി 2’ എന്ന ചിത്രത്തിലെ തരംഗത്തിന് ശേഷം ധനുഷും സായ് പല്ലവിയും വീണ്ടും ഒന്നിക്കുന്ന ചിത്രം കൂടിയാണിത്. കൂടാതെ 2013-ൽ പുറത്തിറങ്ങിയ ‘കമ്മത്ത് ആൻഡ് കമ്മത്ത്’ എന്ന മലയാള ചിത്രത്തിൽ ധനുഷ് അതിഥി വേഷത്തിൽ എത്തിയതിന് ശേഷം, നീണ്ട 13 വർഷങ്ങൾ കഴിഞ്ഞാണ് മമ്മൂട്ടിയും ധനുഷും ഒന്നിച്ച് ഒരു പൂർണ്ണ നീള വേഷത്തിൽ സ്ക്രീനിലെത്തുന്നത്. യുവ മ്യൂസിക് സെൻസേഷൻ സായ് അഭയങ്കർ ആദ്യമായി ധനുഷ് ചിത്രത്തിന് സംഗീതം ഒരുക്കുന്നു എന്ന സവിശേഷതയും ഇതിനുണ്ട്. ചിത്രത്തിന്റെ പ്രധാന ഷൂട്ടിംഗ് ഷെഡ്യൂളുകൾ ഉടൻ തന്നെ ആരംഭിക്കും.