രണ്ടാമത്തെ തിങ്കളാഴ്ചയും ഞെട്ടിപ്പിച്ച് 'തുടരും

 മലയാള സിനിമയിൽ സമീപകാലത്ത് ഏറ്റവും ജനപ്രീതി നേടിയ ചിത്രമായി മാറുകയാണ് മോഹൻലാൽ നായകനായ തുടരും. ഏപ്രിൽ 25 ന് തിയറ്ററുകളിൽ എത്തിയ ചിത്രം വലിയ പ്രീ റിലീസ് പബ്ലിസിറ്റി ഇല്ലാതെ തന്നെ ആദ്യദിനം മുതൽ ജനം ഏറ്റെടുത്തിരിക്കുകയാണ്. 

ചിത്രം ഒരു ഫാമിലി ഡ്രാമ ആണെന്നും എന്നാൽ ഫീൽ ഗുഡ് അല്ലെന്നുമാണ് സംവിധായകൻ തരുൺ മൂർത്തി റിലീസിന് മുൻപ് പറഞ്ഞത്. ഹൈപ്പ് കൂട്ടാതിരിക്കാനായി ചിത്രത്തിൻറെ ആക്ഷൻ, ത്രില്ലർ അംശങ്ങൾ അണിയറക്കാർ ബോധപൂർവ്വം മറച്ചുവെക്കുകയായിരുന്നു. എന്നാൽ ആദ്യ ഷോകൾക്കിപ്പുറം വമ്പൻ മൗത്ത് പബ്ലിസിറ്റി നേടിയതോടെ ഇന്നുവരെ ബോക്സ് ഓഫീസിൽ ചിത്രത്തിന് തിരിഞ്ഞുനോക്കേണ്ടി വന്നിട്ടില്ല. 

ഇപ്പോഴിതാ രണ്ടാം തിങ്കളാഴ്ചയും മികച്ച ആഭ്യന്തര കളക്ഷനാണ് തുടരും ഉറപ്പാക്കിയിരിക്കുന്നത്. രണ്ടാം മൺഡേ ടെസ്റ്റ് എന്ന് വിളിക്കാവുന്ന വർക്കിംഗ് ഡേ ആയ മെയ് 5ന്  മോഹൻലാലിൻറെ തുടരും  ആഭ്യന്തര ബോക്സോഫീസിൽ നേടിയത് 5.15 കോടിയാണ്. ചിത്രം റിലീസ് ചെയ്ത് 11 ദിവസം കഴിഞ്ഞിട്ടും ചിത്രത്തിൻറെ നെറ്റ് കളക്ഷൻ ഇതുവരെ 5 കോടിക്ക് താഴെ പോയിട്ടില്ല എന്നത് വലിയ സൂചനയാണ്. 

ചിത്രം പല കളക്ഷൻ റെക്കോഡുകളും തകർത്തേക്കും എന്നാണ് സൂചന. ട്രാക്കർമാർ നൽകുന്ന ഏറ്റവും പുതിയ വിവരം അനുസരിച്ച് ചിത്രം ആഗോള ബോക്സ് ഓഫീസിൽ നിന്ന് 150 കോടി കടന്നിട്ടുണ്ട്. പുലിമുരുകനെ മറികടന്ന് മലയാളത്തിൽ 150 കോടിയിൽ അധികം നേടുന്ന ആറാമത്തെ ചിത്രമായിരിക്കുകയാണ് തുടരും. 

ആവേശവും ആടുജീവിതവുമാണ് കളക്ഷനിൽ ഇനി തുടരുമിന് മുന്നിൽ ഉള്ളത്. ആവേശം 156 കോടിയും ആടുജീവിതം 158.50 കോടിയുമാണ് ആകെ നേടിയത്. ഇന്നത്തെ കളക്ഷൻ കൊണ്ട് തുടരും ഈ രണ്ട് ചിത്രങ്ങളെയും മറികടന്നാലും അത്ഭുതപ്പെടാനില്ല. 

ഷണ്മുഖം എന്ന ടാക്സി ഡ്രൈവറായാണ് ചിത്രത്തിൽ മോഹൻലാൽ എത്തുന്നത്. ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവർക്കൊപ്പം നിരവധി പുതുമുഖങ്ങളും ചിത്രത്തിൽ അഭിനയിക്കുന്നു. ഷാജി കുമാർ ആണ് ഛായാ​ഗ്രഹണം. എഡിറ്റിം​ഗ് നിഷാദ് യൂസുഫ്, ഷെഫീഖ് വി ബി, സം​ഗീതം ജേക്സ് ബിജോയ്, എക്സിക്യൂട്ടീവ് പ്രൊഡ്യൂസർ അവന്തിക രഞ്ജിത്ത്