അഭിനയജീവിതത്തിൽ 48 വർഷങ്ങൾ പൂർത്തിയാക്കി ; വികാരനിർഭരമായ കുറിപ്പ‌ുമായി ചിരഞ്ജീവി

 തെലുങ്ക് സിനിമയുടെ മെഗാസ്റ്റാർ ചിരഞ്ജീവി അഭിനയജീവിതത്തിൽ 48 വർഷങ്ങൾ പൂർത്തിയാക്കിയിരിക്കുന്നു. തന്റെ സിനിമായാത്രയെ ഓർമിപ്പിച്ചുകൊണ്ട് സാമൂഹ്യമാധ്യമമായ എക്സിൽ അദ്ദേഹം പങ്കുവെച്ച വികാരനിർഭരമായ കുറിപ്പ് ഏറെ ശ്രദ്ധിക്കപ്പെട്ടു. തനിക്ക് ലഭിച്ച ഔദ്യോഗിക നേട്ടങ്ങളേക്കാളും പുരസ്കാരങ്ങളേക്കാളും ഉപരിയായി പ്രേക്ഷകർ നൽകിയ സ്നേഹത്തിനാണ് താൻ എന്നും പ്രാധാന്യം നൽകുന്നതെന്ന് അദ്ദേഹം വ്യക്തമാക്കി. തന്നിൽ വിശ്വാസമർപ്പിച്ച നിർമാതാക്കൾക്കും, പുതിയ വശങ്ങൾ കണ്ടെത്തിയ സംവിധായകർക്കും, ഒപ്പം കഠിനാധ്വാനം ചെയ്ത സാങ്കേതിക വിദഗ്ധർക്കും ഒപ്പം തന്നെ ഒരു കുടുംബാംഗമായി കണ്ട് സ്നേഹം ചൊരിഞ്ഞ ആരാധകർക്കും താരം ഹൃദയം നിറഞ്ഞ നന്ദി അറിയിച്ചു.

കോനിഡേല ശിവ ശങ്കര വര പ്രസാദ് എന്ന യഥാർത്ഥ പേരുമായി സിനിമയിലെത്തിയ അദ്ദേഹം, 1978 സെപ്റ്റംബർ 22-ന് തിയേറ്ററുകളിൽ എത്തിയ ‘പ്രാണം ഖരീദു’ എന്ന ചിത്രത്തിലൂടെയാണ് തുടക്കം കുറിച്ചത്. തുടക്കത്തിൽ പ്രതിനായക വേഷങ്ങൾ ചെയ്ത അദ്ദേഹം പിന്നീട് നായകനായി വളരുകയും 1983-ൽ പുറത്തിറങ്ങിയ ‘ഖൈദി’യിലൂടെ തന്റെ കരിയറിൽ വലിയൊരു വഴിത്തിരിവ് സൃഷ്ടിക്കുകയും ചെയ്തു. തുടർന്ന് 150-ലധികം ചിത്രങ്ങളിൽ നായകനായ അദ്ദേഹം തെലുങ്ക് സിനിമയിലെ അപൂർവ്വ നേട്ടങ്ങളുടെ ഉടമയായി മാറി. 1992-ൽ പുറത്തിറങ്ങിയ ‘ആപദ്ബാന്ധവുഡു’ എന്ന ചിത്രത്തിനായി 1.25 കോടി രൂപ പ്രതിഫലം വാങ്ങി ഇന്ത്യയിൽ ഒരു കോടി ക്ലബ്ബിൽ ഇടംനേടുന്ന ആദ്യ നടനെന്ന ചരിത്രനേട്ടവും ചിരഞ്ജീവി സ്വന്തമാക്കി.

സിനിമയിലെ വൻ വിജയങ്ങൾക്ക് ശേഷം രാഷ്ട്രീയത്തിൽ പ്രവേശിച്ച താരം ഏകദേശം ഒരു പതിറ്റാണ്ടോളം അഭിനയരംഗത്തുനിന്നും വിട്ടുനിന്നു. 2008-ൽ പ്രജാരാജ്യം പാർട്ടി സ്ഥാപിക്കുകയും പിന്നീട് കേന്ദ്രമന്ത്രിയായി സേവനമനുഷ്ഠിക്കുകയും ചെയ്ത അദ്ദേഹം, 2017-ൽ ‘ഖൈദി നം. 150’ എന്ന ചിത്രത്തിലൂടെ ശക്തമായ തിരിച്ചുവരവാണ് നടത്തിയത്. തുടർന്നിങ്ങോട്ട് ‘സെയ്‌റാ നരസിംഹ റെഡ്ഡി’, ‘വാൾട്ടയർ വീരയ്യ’, സമീപകാലത്ത് റിലീസ് ചെയ്ത് വലിയ സാമ്പത്തിക വിജയം നേടിയ ‘മന ശങ്കര വര പ്രസാദ് ഗാരു’ തുടങ്ങിയ ചിത്രങ്ങളിലൂടെ തന്റെ ബോക്സ് ഓഫീസ് മൂല്യം ഒരിക്കൽക്കൂടി അദ്ദേഹം തെളിയിച്ചു. പാൻ ഇന്ത്യൻ തലത്തിലും തന്റേതായ സ്വാധീനം ഉറപ്പിക്കാൻ അദ്ദേഹത്തിന് സാധിച്ചിട്ടുണ്ട്.

കരിയറിനിടയിൽ നിരവധി വലിയ അംഗീകാരങ്ങളാണ് ചിരഞ്ജീവിയെ തേടിയെത്തിയിട്ടുള്ളത്. 2006-ൽ പത്മഭൂഷൻ നൽകി രാജ്യം അദ്ദേഹത്തെ ആദരിച്ചപ്പോൾ, 2024-ൽ ഇന്ത്യയുടെ പരമോന്നത പുരസ്‌കാരങ്ങളിലൊന്നായ പത്മവിഭൂഷനും അദ്ദേഹത്തിന് ലഭിച്ചു. കൂടാതെ മികച്ച നടനുള്ള ഫിലിംഫെയർ പുരസ്‌കാരങ്ങൾ, ഐ.എഫ്.എഫ്.ഐ.യുടെ ഇന്ത്യൻ ഫിലിം പേഴ്‌സണാലിറ്റി ഓഫ് ദി ഇയർ അവാർഡ്, ഗിന്നസ് ലോക റെക്കോർഡ് എന്നിവയും അദ്ദേഹത്തിന്റെ കരിയറിലെ തിളക്കമാർന്ന ഏടുകളാണ്. നിലവിൽ ബോബി കൊല്ലിയുടെ ‘കോക’, വസിഷ്ഠയുടെ ഫാന്റസി ചിത്രമായ ‘വിശ്വംഭര’ തുടങ്ങിയ വലിയ പ്രോജക്റ്റുകളുമായി അഭിനയരംഗത്ത് സജീവമായി തുടരുകയാണ് ഈ മെഗാസ്റ്റാർ.