'ബെത്ലഹേം കുടുംബ യൂണിറ്റ്' ബോക്‌സ് ഓഫീസില്‍ തരംഗമാകുന്നു

ഈ വര്‍ഷത്തെ ഓണം റിലീസുകളില്‍ പ്രേക്ഷകര്‍ ഏറെ ആകാംക്ഷയോടെ കാത്തിരുന്ന നിവിന്‍ പോളി - മമിത ബൈജു ചിത്രം 'ബെത്ലഹേം കുടുംബ യൂണിറ്റ്' ബോക്‌സ് ഓഫീസില്‍ തരംഗമാകുന്നു. 'പ്രേമലു'വിന് ശേഷം ഗിരീഷ് എ.ഡി. സംവിധാനം ചെയ്ത ചിത്രം തിയേറ്ററുകളില്‍ മികച്ച പ്രതികരണം നേടി മുന്നേറുമ്പോള്‍, ആദ്യദിനം തന്നെ റെക്കോര്‍ഡ് കളക്ഷനാണ് ചിത്രം സ്വന്തമാക്കിയിരിക്കുന്നത്.

ബോക്‌സ് ഓഫീസ് ട്രാക്കിങ് സൈറ്റായ സാക്‌നില്‍ക്കിന്റെ റിപ്പോര്‍ട്ട് പ്രകാരം ആഗോളതലത്തില്‍ 15.63 കോടി രൂപയാണ് ആദ്യദിനം ചിത്രം നേടിയത്. കേരളത്തില്‍ നിന്ന് മാത്രം 4.4 കോടി രൂപ കളക്ട് ചെയ്ത ചിത്രം ഇന്ത്യയില്‍ നിന്നൊട്ടാകെ 5.70 കോടിയും സ്വന്തമാക്കി. നിവിന്‍ പോളിയുടെ കരിയറിലെ തന്നെ ഏറ്റവും മികച്ച ആദ്യദിന ഓപ്പണിംഗ് കളക്ഷനാണിത്.

ഓണക്കാലത്ത് കുടുംബസമേതം കണ്ടിരിക്കാവുന്ന മികച്ചൊരു ഫീല്‍ ഗുഡ് എന്റര്‍ടെയ്നറാണ് ചിത്രമെന്നാണ് പ്രേക്ഷക പ്രതികരണങ്ങള്‍. തണ്ണീര്‍മത്തന്‍ ദിനങ്ങള്‍, സൂപ്പര്‍ ശരണ്യ, പ്രേമലു എന്നീ ചിത്രങ്ങള്‍ക്ക് ശേഷം ഗിരീഷ് എ.ഡി. ഒരുക്കിയ ഈ ചിത്രം ഭാവന സ്റ്റുഡിയോസിന്റെ ബാനറില്‍ ഫഹദ് ഫാസില്‍, ദിലീഷ് പോത്തന്‍, ശ്യാം പുഷ്‌കരന്‍ എന്നിവര്‍ ചേര്‍ന്നാണ് നിര്‍മ്മിച്ചിരിക്കുന്നത്. ആദ്യ ദിനത്തിലെ മികച്ച കളക്ഷനും അഭിപ്രായങ്ങളും വച്ചുനോക്കുമ്പോള്‍ വരും ദിവസങ്ങളിലും ചിത്രം വലിയ രീതിയിലുള്ള മുന്നേറ്റം തുടരുമെന്നാണ് വിലയിരുത്തല്‍.