ഒടിടിയിലും മികച്ച വിജയം നേടി ‘ബാലൻ ദി ബോയ്’

 ‘മഞ്ഞുമ്മൽ ബോയ്‌സ്’ എന്ന ബ്ലോക്ക്ബസ്റ്ററിന് ശേഷം ചിദംബരം സംവിധാനം ചെയ്ത ‘ബാലൻ ദി ബോയ്’ ഒടിടിയിലും മികച്ച വിജയം നേടി മുന്നേറുകയാണ്. ഡിജിറ്റൽ പ്രീമിയറിന് ശേഷം വളരെ ചുരുങ്ങിയ ദിവസങ്ങൾക്കുള്ളിൽ ചിത്രം 10 കോടി (100 ദശലക്ഷം) സ്ട്രീമിംഗ് മിനിറ്റുകൾ പിന്നിട്ടു. കെവിഎൻ പ്രൊഡക്ഷൻസും തെസ്പിയൻ ഫിലിംസും ചേർന്ന് നിർമ്മിച്ച ഈ ചിത്രത്തിന്റെ രചന നിർവഹിച്ചിരിക്കുന്നത് പ്രശസ്ത സംവിധായകൻ ജിത്തു മാധവനാണ്. ജൂലൈ 31-ന് സി5 ഒടിടി പ്ലാറ്റ്‌ഫോമിൽ റിലീസ് ചെയ്ത ചിത്രം, തിയേറ്ററുകളിലെന്ന പോലെ ഡിജിറ്റൽ രംഗത്തും മികച്ച പ്രതികരണമാണ് നേടുന്നത്. ഈ വർഷത്തെ ഒടിടിയിലെ ഏറ്റവും ജനപ്രീതിയുള്ള മലയാള ചിത്രങ്ങളിൽ ഒന്നായി ഇതിനോടകം ‘ബാലൻ ദി ബോയ്’ മാറി കഴിഞ്ഞു.

കാണാതായ അമ്മയെ തേടിയുള്ള ഒരു കൗമാരക്കാരന്റെ വൈകാരികമായ ജീവിതയാത്രയാണ് ചിത്രത്തിന്റെ പ്രധാന പ്രമേയം. ടൊവിനോ തോമസ്, അഭിരാം രാധാകൃഷ്ണൻ, ജീൻ പോൾ ലാൽ, ഗിരീഷ് എ.ഡി, ബീന ആന്റണി, ഫർസാന പാലത്തിങ്കൽ, ആനന്ദ് ഏകർഷി തുടങ്ങിയ പ്രമുഖ താരനിര ചിത്രത്തിൽ അണിനിരന്നിട്ടുണ്ട്.

ചിത്രത്തിന് ലഭിക്കുന്ന സ്വീകാര്യതയിൽ സന്തോഷം പ്രകടിപ്പിച്ച് അണിയറപ്രവർത്തകരും രംഗത്തെത്തിയിട്ടുണ്ട്. ഈ വിജയം തങ്ങൾക്ക് ഏറെ സന്തോഷം നൽകുന്നുവെന്നും ചിത്രം ഏറ്റെടുത്ത എല്ലാ പ്രേക്ഷകർക്കും നന്ദി അറിയിക്കുന്നുവെന്നും സംവിധായകൻ ചിദംബരവും ZEE5 സൗത്ത് മാർക്കറ്റിംഗ് ഹെഡ് ലോയിഡ് സി സേവ്യറും വ്യക്തമാക്കി. നിലവിൽ മലയാളം, തമിഴ്, തെലുങ്ക്, കന്നഡ ഭാഷകളിൽ ZEE5-ലൂടെ ചിത്രം ആസ്വദിക്കാവുന്നതാണ്.