.jpg)
കൈയടി നേടി 'ആലപ്പുഴ ജിംഖാന'
നസ്ലിന്‍, ഗണപതി, ലുക്ക്മാന്‍, സന്ദീപ് പ്രദീപ് എന്നിവരെ പ്രധാന കഥാപാത്രങ്ങളാക്കി ഖാലിദ് റഹ്മാന്‍ സംവിധാനം ചെയ്ത ‘ആലപ്പുഴ ജിംഖാന’ മികച്ച പ്രേക്ഷക പ്രതികരണവുമായി മുന്‍പോട്ട്. ചിരിയിലും നല്ല പൊരിഞ്ഞ ഇടിയിലും കോര്‍ത്തെടുത്ത മറ്റൊരു തല്ലുമാല തന്നെയാണ് ഖാലിദ് റഹ്മാന്‍ ഇത്തവണയും പ്രേക്ഷകര്‍ക്കായി ഒരുക്കിയിരിക്കുന്നത്. വിഷു റിലീസായി ഇന്ന് തീയേറ്ററുകളിലെത്തിയ ചിത്രം ബോക്‌സിങ് സിനിമകളുടെ സ്ഥിരം ക്ലീഷേകൾ ഒന്നുമില്ലാതെ പക്കാ റിയലിസ്റ്റിക് ആയിട്ടാണ് എടുത്തിരിക്കുന്നത്.
ദേശീയതലത്തില്‍ ബോക്‌സിങ് ചാമ്പ്യനായ ആന്റണി ജോഷ്വ എന്ന കോച്ചിന്റേയും ആലപ്പുഴ ജിംഖാനയിലെ പിള്ളേരുടേയും കഥയാണ് ചിത്രം പറയുന്നത്. ലുക്മാന്‍ അവറാനും നസ്ലിനും ഗണപതിയുമടങ്ങുന്ന ഒരു കൂട്ടം യുവതാരങ്ങള്‍ റിങ്ങിലെത്തുന്ന ജിംഖാന കാണികളെ രസിപ്പിക്കുന്നുണ്ട്. അനുരാഗ കരിക്കിന്‍ വെള്ളം, ഉണ്ട, ലവ്, തല്ലുമാല തുടങ്ങിയ സിനിമകളിലെ ഖാലിദ് റഹ്മാന്റെ കഥപറച്ചില്‍ ശൈലിയുടെ മനോഹാരിത ആലപ്പുഴ ജിംഖാനയിലും കാണാം.
തിയേറ്ററില്‍ നിറഞ്ഞ കൈയടികളോടെ കാണാന്‍ പറ്റിയ ഈ സ്‌പോര്‍ട്‌സ് കോമഡി എന്റര്‍ടെയ്‌നര്‍ ബോക്‌സ് ഓഫീസ് ഇടിച്ചുകയറുമെന്നാണ് പ്രേക്ഷകര്‍ പറയുന്നത്. പ്രേമലുവിന് ശേഷം നസ്ലിന്റെ മറ്റൊരു ഹിറ്റ് കൂടി സംഭവിക്കുമെന്നും പ്രേക്ഷക വിലയിരുത്തലുണ്ട്. പ്രേമലുവിന് ലഭിച്ചതുപോലെ യൂത്തിന്റെ വലിയൊരു പിന്തുണ ആലപ്പുഴ ജിംഖാനയ്ക്കും ലഭിക്കുന്നുണ്ട്. ജിംഷി ഖാലിദിന്റെ ഛായാഗ്രഹണം ചിത്രത്തിന്റെ പ്രധാന ആകര്‍ഷണമാണ്.
പ്ലാന്‍ ബി മോഷന്‍ പിക്‌ചേഴ്‌സിന്റെ ബാനറിലും റീലിസ്റ്റിക് സ്റ്റുഡിയോയുടെ ബാനറിലും ഖാലിദ് റഹ്മാന്‍, ജോബിന്‍ ജോര്‍ജ്, സമീര്‍ കാരാട്ട്, സുബീഷ് കണ്ണഞ്ചേരി എന്നിവര്‍ ചേര്‍ന്നാണ് നിര്‍മാണം. പ്ലാന്‍ ബി മോഷന്‍ പിക്‌ചേഴ്‌സിന്റെ ആദ്യ നിര്‍മാണ സംരംഭമാണിത്. ഖാലിദ് റഹ്മാനും ശ്രീനി ശശീന്ദ്രനും ചേര്‍ന്ന് തിരക്കഥ രചിച്ച ചിത്രത്തിനായി സംഭാഷണങ്ങള്‍ തയ്യാറാക്കിയിരിക്കുന്നത് രതീഷ് രവിയാണ്. നസ്ലിന്‍, ഗണപതി, ലുക്ക്മാന്‍, സന്ദീപ് പ്രദീപ്, അനഘ രവി എന്നിവര്‍ കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തിലെ മറ്റ് സുപ്രധാന വേഷങ്ങള്‍ ഫ്രാങ്കോ ഫ്രാന്‍സിസ്, ബേബി ജീന്‍, ശിവ ഹരിഹരന്‍, ഷോണ്‍ ജോയ്, കാര്‍ത്തിക്, നന്ദ നിഷാന്ത്, നോയില ഫ്രാന്‍സി തുടങ്ങിയവരാണ് കൈകാര്യം ചെയ്യുന്നത്.
